ຍົກລະດັບວຽກງານອະນຸລັກສັດປ່າໃຫ້ສື່ມວນຊົນລາວ ນັກຂ່າວ

ຍົກລະດັບວຽກງານອະນຸລັກສັດປ່າໃຫ້ສື່ມວນຊົນລາວ ນັກຂ່າວ

ຂປລ. ສື່ມວນຊົນລາວ ຈາກຫລາຍພາກສ່ວນ ຢູ່ສູນກາງ ແລະ ທ້ອງຖິ່ນ ໄດ້ເຂົ້າຮ່ວມການຍົກລະດັບຄວາມຮູ້ ກ່ຽວກັບວຽກງານອະນຸລັກ ແລະ ສະກັດກັ້ນ ການຄ້າຂາຍສັດປ່າ ໃນລະຫວ່າງ ວັນທີ 18-24 ມັງກອນ 2021 ຢູ່ຫ້ອງການອຸທິຍານແຫ່ງຊາດ ນໍ້າແອດ-ພູເລີຍ, ເມືອງຮ້ຽມ ແຂວງຫົວພັນ, ໂດຍສະມາຄົມນັກຂ່າວ ແຫ່ງ ສປປ ລາວ ຮ່ວມກັບອົງການອະນຸລັກສັດ (WCS) ຮ່ວມກັນຈັດຂຶ້ນ, ພາຍຫລັງໄດ້ຮັບການສະໜັບສະໜູນ ຈາກອົງການຮ່ວມມືເຢຍລະມັນ (GIZ) ປະຈໍາລາວ. ການສໍາມະນາໃນຄັ້ງນີ້, ສື່ມວນຊົນລາວໄດ້ຮັບຟັງ ແລະ ແລກປ່ຽນຄວາມຮູ້ໃນວຽກງານອານຸລັກສັດປ່າ ຈາກອົງການ WCS ແລະ ເຈົ້າໜ້າທີ່ ຂອງກອງຄຸ້ມຄອງເຂດອຸທິຍານດັ່ງກ່າວ, ເປັນຕົ້ນແມ່ນວຽກງານອະນຸລັກສັດປ່າ, ການຄຸ້ມຄອງທໍາມະຊາດ, ການສົ່ງເສີມການມີສ່ວນຮ່ວມ ຂອງປະຊາຊົນທ້ອງ ຖິ່ນໃນການອະນຸລັກສັດປ່າ ແລະ ທໍາມະຊາດ, ການສົ່ງເສີມໃຫ້ປະຊາຊົນມີລາຍຮັບ ຈາກການບໍລິການທ່ອງທ່ຽວພາຍໃນອຸທິຍານຜ່ານສອງກິດຈະກໍາ ຄື: ການລ່ອງເຮືອ ເພື່ອຊົມສັດປ່າໃນຍາມຄໍ່າຄືນ ແລະ ການຍ່າງປ່າເພື່ອຊົມສັດປ່າ ແລະ ທໍາມະຊາດ ຢູ່ອຸທິຍານແຫ່ງຊາດນໍ້າແອດ-ພູເລີຍ.ຂະນະດຽວກັນ, ການສ້າງຕັ້ງອຸທິຍານແຫ່ງນີ້, ກໍເພື່ອບໍ່ໃຫ້ປະຊາຊົນເຂົ້າໄປບຸກລຸກ ແລະ ທໍາລາຍປ່າໄມ້ ດ້ວຍການຈັບ ຈອງດິນເພື່ອເຮັດການຜະລິດ, ຂຸດຄົ້ນໄມ້ ແລະ ລ່າສັດປ່າ. ນອກນີ້, ຍັງໄດ້ຮັບຟັງກ່ຽວກັບສະພາບການຄ້າຂາຍສັດປ່າ ກໍຄື ອາຊະຍາກໍາທາງສັດປ່າທີ່ເກີດຂຶ້ນໃນພາກພື້ນ ແລະ ໃນລາວ ທີ່ຍັງເກີດຂຶ້ນຢ່າງຕໍ່ເນື່ອງໃນຫລາກຫລາຍຮູບແບບ,  ເພື່ອເປັນຂໍ້ມູນອ້າງອີງ ນໍາໃຊ້ໃນການຂຽນຂ່າວ, ຂຽນບົດ ແລະ ການຜະລິດລາຍການຕ່າງໆ ກ່ຽວກັບການອະນຸລັກ ແລະ ສະກັດກັ້ນການຄ້າຂາຍສັດປ່າ ໃຫ້ສັງຄົມໄດ້ຮັບຮູ້ຢ່າງຖືກຕ້ອງ, ເພື່ອແນໃສ່ເຮັດໃຫ້ສະພາບການລ້າ ແລະ ຄ້າຂາຍສັດປ່າ ຢູ່ປະເທດເຮົານັບມື້ຫລຸດລົງ.ສໍາລັບ ອຸທິຍານແຫ່ງຊາດນໍ້າແອດ-ພູເລີຍ, ຖືກຍົກລະດັບຈາກປ່າສະຫງວນແຫ່ງຊາດນໍ້າແອດ-ພູເລີຍໃນເມື່ອກ່ອນ, ເຊິ່ງເປັນໜຶ່ງໃນປ່າສະຫງວນ 25 ແຫ່ງໃນ ສປປ ລາວ, ມີຄວາມສໍາຄັນລະດັບຊາດ ກໍຄື ລະດັບໂລກ.

ເນື່ອງຈາກອຸທິຍານແຫ່ງນີ້, ເປັນແຫລ່ງສະໜອງອາຫານແບບຍືນຍົງ, ເປັນແຫລ່ງຍອດ ນໍ້າ, ຂະຫຍາຍສັດປ່າ, ແຫລ່ງພືດເປັນຢາ ແລະ ຊ່ວຍຫລຸດຜ່ອນ ການປ່ຽນແປງດິນຟ້າອາກາດ. ປັດຈຸບັນ, ອຸທິຍານແຫ່ງນີ້ ມີເນື້ອທີ່ຫລາຍກວ່າ 4 ແສນເຮັກຕາ. ມີສັດປ່າສະຫງວນ ທີ່ໃກ້ສູນພັນປະເພດເສືອໂຄ່ງກວ່າ 6 ຊະນິດ, ສັດລ້ຽງລູກດ້ວຍນົມ ຫລາຍກວ່າ 50 ສາຍພັນ ແລະ ນົກຫລາຍກວ່າ 300 ສາຍພັນ. ຂ່າວ: ສຸພາສະຫວັນ

 

sienglamphong