ເຈ້ນາງ ໝັ້ນໃຈໃນຕົວຂອງສາມີ ບໍ່ມີສ່ວນກ່ຽວຂ້ອງ ຫຼັງສາມີຊາວໄທຖືກຈັບຂໍ້ຫາຟອກເງິນ

ເຈ້ນາງ ໝັ້ນໃຈໃນຕົວຂອງສາມີ ບໍ່ມີສ່ວນກ່ຽວຂ້ອງ ຫຼັງສາມີຊາວໄທຖືກຈັບຂໍ້ຫາຟອກເງິນ

(19 ກັນຍາ 2019) ສື່ໄທລາຍງານວ່າ ຕຳຫຼວດແຂວງນະຄອນລາດຊະສີມາ ຂອງໄທ ໄດ້ຖະແຫຼງຜົນການຈັບກຸມຄະດີຟອກເງິນເຄືອຂ່າຍຄ້າຢາເສບຕິດລາຍໃຫຍ່ຂອງພາກອີສານ ໂດຍໄດ້ຜູ້ຖືກຫາ 1 ຄົນຄື ຣັດຊະພູມ ສຸດຫຼ້າ ອາຍຸ 41 ປີ ຊາວໄທ ຜູ້ເປັນສາມີຂອງ ເຈ້ນາງ, ພ້ອມຂອງກາງເປັນເງິນສົດສະກຸນໄທ 1.5 ລ້ານບາດ, ເງິນສົດສະກຸນເງິນລາວ 5 ລ້ານກີບ, ບັນຊີທະນາຄານ 4 ເຫຼັ້ມ, ລົດກະບະ 4 ປະຕູ, ສາຍຄໍຄຳໜັກ 5 ບາດ, ແຫວນເພັດ 1.8 ກະຣັດ ແລະ ຊັບສິນອື່ນໆລວມ 24 ລາຍການ.

ລາຍງານການສອບສວນ ພົບວ່າ ຣັດຊະພູມ ເປັນເຄືອຂ່າຍຄ້າຢາເສບຕິດລາຍໃຫຍ່ທີ່ຮັບຖ່າຍໂອນເງິນໃນບັນຊີຂອງຕົວການໃຫຍ່ ຊື່ວ່າ ຫານສຶກ (ບໍ່ຮູ້ນາມສະກຸນ) ທີ່ມີພຶດຕິກຳຄ້າຢາເສບຕິດ ກັບເຄືອຂ່າຍໃຫຍ່ໃນ ສປປ ລາວ, ພົບວ່າມີເງິນໝູນວຽນໃນບັນຊີທະນາຄານກວ່າ 10 ບັນຊີ ໃນໄລຍະ 4 ເດືອນຫຼ້າສຸດ 200 ລ້ານບາດ ຍັງຢູ່ໃນລະຫວ່າງຕິດຕາມຈັບກຸມ

ເບື້ອງຕົ້ນ ຣັດຊະພູມ ໃຫ້ການປະຕິເສດຂໍ້ກ່າວຫາ ອ້າງວ່າປະກອບທຸລະກິດເປີດຮ້ານຂາຍຄຳ ແລະ ຮັບແລກປ່ຽນເງິນຕາ ຢູ່ ສປປ ລາວ, ຈະຖອນເງິນຄັ້ງລະ 5 ແສນ ຫາ 5 ລ້ານບາດ ກ່ອນໂອນເຂົ້າບັນຊີລູກຄ້າ ແລະ ນຳເງິນຂ້າມປະເທດລາວມາໃຫ້ລູກຄ້າ ແຕ່ທາງຕຳຫຼວດກ່າວວ່າມີຫຼັກຖານໜາແໜ້ນວ່າມີສ່ວນເຊື່ອມໂຍງກັບເງິນຄ້າຢາເສບຕິດ ລັກສະນະເປັນຂະບວນການຟອກເງິນຜິດກົດໝາຍ

ທາງດ້ານ ເຈ້ນາງ ສາວສະຫວັນນະເຂດຄົນດັງໃນໂລກອອນລາຍ ທັງເປັນພັນລະຍາຂອງ ຣັດຊະພູມ ຜູ້ຖືກຫາດັ່ງກ່າວ ໄດ້ອອກມາໂພສເຖິງກໍລະນີດັ່ງກ່າວວ່າ ເຊື່ອໝັ້ນວ່າສາມີຂອງຕົນບໍ່ໄດ້ມີສ່ວນຮ່ວມກັບຂະບວນການຄ້າຢາເສບຕິດ ແລະ ຟອກເງິນ, ທາງທະນາຍຂອງສາມີກຳລັງປະກອບເອກະສານເພື່ອເຂົ້າໄປສະແດງ ແລະ ຢັ້ງຢືນຕໍ່ເຈົ້າໜ້າທີ່

sienglamphong