ຈັບໜຸ່ມສາວຄ້າຢາເສບຕິດ ດ້ວຍຂອງກາງ 5.173 ເມັດ ທີ່ເມືອງວັງວຽງ ແຂວງວຽງຈັນ

ຈັບໜຸ່ມສາວຄ້າຢາເສບຕິດ ດ້ວຍຂອງກາງ 5.173 ເມັດ ທີ່ເມືອງວັງວຽງ ແຂວງວຽງຈັນ

ໃນຊ່ວງຕົ້ນເດືອນກັນຍາ 2019 ຜ່ານມານີ້ ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງວັງວຽງ ແຂວງວຽງຈັນ ໄດ້ຮັບແຫຼ່ງຂ່າວຈາກພົນລະເມືອງດີວ່າ ມີການຊື້-ຂາຍ ຢາເສບຕິດປະເພດຢ່າບ້າຢູ່ຂອບເຂດເທດສະບານເມືອງວັງວຽງ, ຈາກນັ້ນໜ່ວຍງານວິຊາສະເພາະຈຶ່ງໄດ້ລົງຕິດຕາມເປົ້າໝາຍເຫັນວ່າມີມູນຄວາມຈິງ ໃນທີສຸດກໍ່ສາມາດຈັບຕົວເປົ້າໝາຍ ໄດ້ 2 ຄົນຄື ນາງ ຕິ່ງລີ, ອາຍຸ 23 ປີ, ຊາວນາ ຢູ່ບ້ານປາກເປາະ ແລະ ທ້າວ ຕູ້ຊົງ ອາຍຸ 40 ປີ ຊາວນາ ຢູ່ບ້ານໂພນແກ້ວ ທັງສອງຢູ່ ເມືອງວັງວຽງ ແຂວງວຽງຈັນ ພ້ອມຂອງກາງ 5.173 ເມັດ, ພ້ອມລົດໃຫຍ່ ISUZU ຈໍານວນ 1 ຄັນ ມາດຳເນີນການສືບສວນ-ສອບສວນ

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນ ພວກກ່ຽວ ໄດ້ໃຫ້ການຮັບສາລະພາບວ່າ: ຂອງກາງຢາບ້າຈໍານວນ 5.173 ເມັດ ເປັນຂອງພວກກ່ຽວແທ້ ໃນວັນທີ 3 ກັນຍາ 2019 ຜ່ານມາໄດ້ມີຊາຍບໍ່ຊາບຊື່ມາຖາມທ້າວຕູ້ຊົງ ວ່າເອົາຢາບ້າໄປຂາຍບໍໍຈະຂາຍໃຫ້ລາຄາຖືກ ແລ້ວ ທ້າວ ຕູ້ຊົງ ໄດ້ຖາມຄືນວ່າຈະຂາຍມັດເທົ່າໃດ, ຊາຍໜຸ່ມບໍ່ຊາບຊື່ເວົ້າວ່າ ມັດໜື່ງ 2.500.000 ກີບ, ຈາກນັ້ນຜູ້ກ່ຽວຈຶ່ງຕົກລົງສັ່ງ ຈໍານວນ 2 ມັດ ກັບ 6 ຖົງ ຕົກມາຮອດວັນທີ 4 ກັນຍາ ພວກກ່ຽວໄດ້ນັດກັນຊື້-ຂາຍ ຢູ່ເຮືອນພັກແຫ່ງໜື່ງຢູ່ບ້ານພູດິນແດງ, ເມືອໄດ້ຢາຈໍານວນດັ່ງກ່າວກໍ່ໄດ້ຈ່າຍເງີນໃຫ້ຊາຍບໍ່ຊາບຊື່ ຈໍານວນ 7.000.000 ກີບ ຈາກນັ້ນທັງສອງກໍ່ໄດ້ແຍກຈາກກັນໄປຄົນລະທາງ ຕົກມາຮອດວັນທີ 17 ກັນຍາ 2019 ທ້າວ ຕູ້ຊົງ ໄດ້ໂທລະຊັບຫາແຟນ ກໍ່ຄື ນາງ ຕິ່ງລີ ອອກໄປທ່ຽວແລ້ວມາພັກຢູ່ເຮືອນພັກແຫ່ງໜຶ່ງ ຢູ່ບ້ານໂພນເພັງ ເມືອງວັງວຽງ

ນາງ ຕິ່ງລີ ໄດ້ບອກທ້າວ ຕູ້ຊົງ ວ່າມີຄົນຢາກໄດ້ຢາບ້າ ແລ້ວທ້າວ ຕູ້ຊົງ ໄດ້ນໍາຢາມາໃຫ້ນາງ ຕິ່ງລີ ຈໍານວນ 1 ຖົງ ແລ້ວ ເອົາໄປສົ່ງໃຫ້ຜູ້ຮ່ວມຂະບວນການ ຈໍານວນ 27 ເມັດ ຈຶ່ງຖຶກເຈົ້າໜ້າທີ່ກັກຕົວ ພ້ອມຂອງກາງ 173 ເມັດ ແລະ ໄດ້ຊັກທອດຫາຜູ້ຮ່ວມຂະບວນການ ເຈົ້າໜ້າທີ່ຈຶ່ງໄດ້ເຂົ້າກວດຄົ້ນທ້າວ ຕູຊົງ ແລະ ລົດໃຫຍ່ ທີ່ຈອດເຮືອນພັກແຫ່ງໜຶ່ງ ພົບຢາບ້າ ຈໍານວນ 25 ຖົງ ເທົ່າກັບ 5.000 ເມັດ ທີ່ຊຸກເຊືອງໄວ້ໃນລົດ ISUZU ສີປອນ ໝາຍເລກທະບຽນ ກຍ 1709 ກໍາແພງນະຄອນ

ທັງສອງຄົນແມ່ນຖືກເຈົ້າໜ້າທີ່ກັກຕົວໃນຄັ້ງວັນທີ 17 ກັນຍາ 2019 ພ້ອມຂອງກາງຢາບ້າ 5.173 ເມັດ ປະຈຸບັນເຈົ້າໜ້າທີ່ ປກສ ເມືອງວັງວຽງ ກໍາລັງທໍາການສືບສວນ-ສອບສວນ ເພື່ອຂະຫຍາຍຜົນຫາກຸ່ມແກ້ງ, ຜູ້ຮ່ວມຂະບວນການມາດໍາເນີນຄະດີຕາມລະບຽບກົດໝາຍຂອງບ້ານເມືອງ ແລະ ພວມສະຫຼຸບສັງລວມຂໍ້ມູນຫຼັກຖານສົ່ງໃຫ້ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງດໍາເນີນໃນຂັ້ນຕໍ່ໄປ

sienglamphong