ແທັກໝູ່…ທີ່ມັກຢືມເງີນແລ້ວບໍ່ໃຊ້ຄືນ ສຸດທ້າຍເສຍໝູ່ສະນິດໄປ(ເລື່ອງເລົ່າຊິວີດຈີງຢາກບອກໃຫ້ຮູ້)

ແທັກໝູ່…ທີ່ມັກຢືມເງີນແລ້ວບໍ່ໃຊ້ຄືນ ສຸດທ້າຍເສຍໝູ່ສະນິດໄປ(ເລື່ອງເລົ່າຊິວີດຈີງຢາກບອກໃຫ້ຮູ້)

ສະບາຍດີແອັດມິນ ມື້ນີ້ຂ້ອຍຂໍມາເລົ່າປະສົບການຂອງຂ້ອຍ ກັບການທີ່ຄິດວ່າຈະຊ່ວຍເຫຼືອໝູ່ ສຸດທ້າຍແລ້ວສິ່ງທີ່ຂອ້ຍເອີ້ນວ່າ “ຊ່ວຍເຫຼືອ” ນັ້ນກັບກາຍເປັນການທຳລາຍໝູ່ທີ່ຄວາມສຳພັນສະສົມມາເກືອບ 10 ປີ. ນີ້ບໍ່ແມ່ນເລື່ອງທຳອິດຂອງຂ້ອຍ, ມັນເປັນຄັ້ງທີສອງແລ້ວທີ່ຂ້ອຍຕ້ອງເຈິແບບນີ້, ຕອນຄັ້ງທຳອິດນັບຄືນຫຼັງໄປ ເມື່ອ 5 ປີກ່ອນທີ່ໝູ່ສະໄໝຮຽນນຳຂ້ອຍນັ້ນເກີດບັນຫາ ແລະ ຂໍຢືມຂ້ອຍ, ຂ້ອຍກໍ່ໃຫ້ໄປ ສຸດທ້າຍແລ້ວກໍ່ບໍ່ໄດ້ຄືນເລີຍຈົນເຮັດໃຫ້ຄວາມສຳພັນເຮົາຈົບລົງ ຕອນນັ້ນຂ້ອຍກະບໍ່ໄດ້ຄິດຫຍັງ ຄິດແຕ່ວ່າຄືຈະເປັນຍ້ອນນິໃສໝູ່ຜູ້ນັ້ນ ຂ້ອຍກະເລີຍບໍ່ໄດ້ຈະສົນໃຈປານໃດ

ຈົນໃນທີ່ສຸດໃນວັນທີ່ຂ້ອຍເຮັດວຽກ, ອາຊີບຂ້ອຍກະບໍ່ໄດ້ຫວືຫວາ ບໍ່ໄດ້ມີເງິນເດືອນຫຼາຍ,​ເງິນເດືອນຂ້ອຍກະ 2 ລ້ານປາຍ, ຖ້າຖາມວ່າພໍກິນພໍຈ່າຍບໍ່ໃນແຕ່ລະເດືອນ ? ກະພໍໆປະທັງຊີວິດໄດ້ ແຕ່ຈະໃຫ້ວ່າພໍກັບຄວາມຕ້ອງການບໍ່? ມັນບໍ່ພໍແນ່ນອນ. ຂອ້ຍກະໃຊ້ຊີວິດຂອງຂ້ອຍໄປວັນໆພໍກຸ້ມປາກກຸ້ມທ້ອງ, ວັນດີຄືນດີ ນາງ ກ ໝູ່ສະໜິດຂອງຂ້ອຍນັ້ນບອກວ່າເດືອດຮ້ອນເງິນຫຼາຍ, ຄິດຫາໃຜບໍ່ອອກ, ຄິດອອກແຕ່ຊື່ຂ້ອຍຄົນດຽວໃນເວລານັ້ນ, ແລະ ຫາເງິນໄດ້ຈະຮີບມາໃຊ້ທັນທີ. ຂ້ອຍກະຄິດໄຕ່ຕອງດົນເຕີບ, ເພາະຂ້ອຍມີປະສົບການແບບນີ້ມາແລ້ວຄັ້ງໜຶ່ງ, ແຕ່ຂ້ອຍຄິດວ່າມັນບໍ່ໜ້າຈະເກີດເລື່ອງແບບນີ້ກັບຂ້ອຍຊ້ຳໆກັນ, ເພາະຜູ້ເກົ່ານັ້ນອາດຈະເປັນຍ້ອນນິໃສລາວແຕ່ ຕິດຫຼິ້ນຕິດກິນ, ສ່ວນຜູ້ນີ້ບໍ່ຄ່ອຍເຫັນລາວຕິດຫຼິ້ນຕິດກິນ, ບໍ່ຄ່ອຍເຫັນນາງໄປກິນເຫຼົ້າກິນເບຍ ແລະ ມີຫຍັງພວກເຮົາຈະແຊສ໌ ເລື່ອງສຸກເລື່ອງດິບນຳກັນມາຕະຫຼອດ,​ລາວຂໍຢືມລ້ານ 5, ແຕ່ຂ້ອຍໃຫ້ບໍ່ໄດ້, ຂ້ອຍເລີຍຕັດສິນໃຈໃຫ້ລາວຢືມ ເປັນຈຳນວນເງິນປະມານ 1 ລ້ານກີບ

ວັນເວລາຜ່ານໄປ ຫຼັງມື້ທີ່ຂ້ອຍໃຫ້ເງິນ ຈາກ 1 ເດືອນເປັນ 3 ເດືອນ, ຈາກ 3 ເດືອນເປັນ 6 ເດືອນ, ຈາກ 6 ເດືອນເລື່ອນມາເປັນປີ ກໍ່ບໍ່ເຫັນຮອດເງົາໝູ່ທີ່ຂ້ອຍສະໜິດ ແລະ ຄົນທີ່ຂ້ອຍຊ່ວຍເຫຼືອ ຂ້ອຍເລີ່ມຈະລັງເລແລ້ວວ່າລາວຈະໃຫ້ຂ້ອຍຄືນຫຼືບໍ່, ແມ່ນຢູ່ວ່າເງິນ 1 ລ້ານຈະເປັນເງິນກ້ອນບໍ່ໃຫ່ຍສຳລັບຫຼາຍຄົນ, ແຕ່ສຳລັບຂ້ອຍແລ້ວ ມັນສາມາດໃຊ້ປະໂຫຍດໃດ້ຫຼາຍໆຢ່າງໄດ້, ມັນສາມາດລ້ຽງປະທັງຊີວິດຂ້ອຍໄປໄດ້ຫຼາຍມື້, ແລະ ຂອງໆເຮົາເຮົາກໍ່ຢາກໄດ້ມັນຄືນແມ່ນບໍ່ລະ ? ຂ້ອຍພະຍາຍາມສົ່ງຫາລາວຫຼາຍໆຄັ້ງ ເພື້ອຖາມຫັ້ນຖາມນີ້, ລາວກະຕອບມາແບບປົກກະຕິ ບໍ່ເຄີຍເອີ່ຍຖາມເລື່ອງຈະໃຊ້ເງິນຂ້ອຍຄືນເລີຍ, ແຖມຍັງມາຊວນຂ້ອຍໄປຫຼິ້ນບ່ອນຫັ້ນບ່ອນນີ້, ຂ້ອຍຕອບບໍ່ມີເງິນ ແຕ່ລາວກະບໍ່ໄດ້ຄິດຈະເວົ້າເລື່ອງເງິນທີ່ຢືມໄປ, ຂ້ອຍເຂົ້າໄປເບິ່ງ ໂປຣຟາຍຂອງລາວ.. ຟ້າເອີ້ຍ!! ເຫັນລາວໂພສໄປຫຼິ້ນບ່ອນຫັ້ນບ່ອນນີ້, ຫຼາຍໆບ່ອນເສີຍ, ຖ້າຄິດວ່າບໍ່ມີເງິນກໍ່ຄົງຈະເປັນໄປບໍ່ໄດ້ຈົນໃນທີ່ສຸດຂ້ອຍໄດ້ຕັດສິນໃຈສົງຖາມລາວ. ຄຳຕອບທີ່ລາວບອກກັບມານັ້ນຄື “ຍັງບໍ່ມີເງິນນະໝູ່ ດຽວໄວ້ມີລະເຮົາຈະຮີບເອົາມາໃຫ້ເດີ້”, ຕອນທີ່ໄດ້ຍິນທຳອິດ ຂ້ອຍຄິດເລີຍວ່າເຮົາຄືຈະບໍ່ໄດ້ຄືນແລ້ວ, ກະເລີຍລອງໃຫ້ໆເວລາລາວອີກຈັກເດືອນກ່ອນ.

ສິ້ນເດືອນຜ່ານໄປ ກໍ່ຍັງຄົງບໍ່ເຫັນຮອດເງົາຂອງລາວ, ໃນຂະນະທີ່ໂປຣຟາຍສ໌ ຂອງລາວນັ້ນກໍ່ຍັງຄົງອັບຮູບໄປຫຼິ້ນໄປທ່ຽວ ບາງໂພສເຫັນຮອດໄປເຊັກອິນເລາະຫ້າງ ຢູ່ປະເທດເພື່ອນບ້ານເສີຍ, ສ່ວນຢູ່ລາວກໍ່ມີແຕ່ໄປເຂົ້າຮ້ານຫຼູໆໄຮໂຊ ແມ້ກະທັ່ງໂຕຂ້ອຍຍັງບໍ່ສາມາດໄປເຂົ້າຮ້ານແບບນັ້ນໄດ້, ແລະ ເດືອນນີ້ຂ້ອຍກໍ່ມີຄ່າໃຊ້ຈ່າຍຫຼາຍ ຂ້ອຍເລີຍອົດບໍ່ໄດ້ທວງໄປອີກຄັ້ງ. ນາງໂວຍກັບມາ, ບອກວ່າກະໂພດເນາະໝູ່ ຫາກະຜ່ານມາຈັກອາທິດໜຶ່ງບໍ່ໃຫ້ເວລາເຮົາແນ່, ເຮົາຈະຫາມາທັນເງິນຕັ້ງວ່າເປັນລ້ານ, ຂ້ອຍອົດບໍ່ໃຫວເລີຍເວົ້າອອກໄປວ່າ ໂຕວ່າບໍ່ມີເງິນ ແຕ່ເຮົາເຫັນໄປເລາະ ໄປຫຼິ້ນໄປທ່ຽວບ່ອນຫັ້ນບ່ອນນີ້ມັນໝາຍຄວາມວ່າແນວໃດ ? ຖ້າໂຕບໍ່ຢາກຢືມ ໂຕໜ້າຈະບອກວ່າໃຫ້ເຮົາຊ່ວຍຕາມຄວາມສາມາດຂອງເຮົາທີ່ຊ່ວຍໄດ້ ບໍ່ແມ່ນມາຂໍຢືມຕາມຈຳນວນແບບນີ້… ຫຼັງຈາກນັ້ນພວກເຮົາກະຖຽງກັນຫຼາຍຂື້ນແລະ ມີຄຳເວົ້າໜຶ່ງນາງບອກອອກມາວ່າ: ເອີ້, ເທື່ອດຽວນີ້ລະ ຄັນຢາກໄດ້ແຮງຫຼາຍປານນັ້ນກະຊິຫາມາໃຫ້ດອກ, ຖ້າຈະເອົາເງິນດ້າມລ້ານມາທຳລາຍຄວາມສຳພັນກັນແບບນີ້ກະເຊີນ ກູບໍ່ຂໍມີໝູ່ແບບນີ້ດອກ, ໝູ່ຫ່າຫຍັງ ຍາມເດືອດຮ້ອນແທນທີ່ຈະຊ່ວຍເຫຼືອ, ຢືມເງິນດ້າມລ້ານກັບມາທວງຖາມບໍ່ເລີກບໍ່ແລ້ວ ຢາກໄດ້ແຮງກະຊິຫາມາໃຫ້ ແລະ ບໍ່ຕ້ອງມາເອິ້ນກູວ່າໝູ່ອີກ ໃຫ້ຄວາມສຳພັນມັນຈົບລົງເທົ່ານີ້, ຈາກນັ້ນນາງກະມິດໄປ ແລະ ບຣ໋ອກເບີຂ້ອຍ, unfriend ຂ້ອຍໃນເຟສບຸກ

ຫຼັງຈາກໄດ້ຍິນຄຳເວົ້າ, ຂ້ອຍປາກບໍ່ອອກ, ຂ້ອຍຕັ້ງຄຳຖາມກັບໂຕເອງວ່າ ນີ້ເຮົາກຳລັງເຮັດຜິດມະຫັນປານນັ້ນພຸ້ນບໍ່ ? ກັບການທີ່ຂ້ອຍທວງເງິນຄືນທີ່ສ່ວນຂອງລາວມາຢືມ, ຖ້າລາວບໍ່ມີແທ້ໆຂ້ອຍກະບໍ່ທວງເທື່ອດອກ, ແຕ່ນີ້ຂ້ອຍພັດເຫັນລາວໄປເລາະບ່ອນຫັ້ນບ່ອນນີ້, ແລະ ຂ້ອຍກະຊ໋ອດເລື່ອງເງິນ, ຂ້ອຍບໍ່ມີສິດທວງຄືນເລີຍຫວາ ? ຖ້າໃນມື້ນັ້ນລາວມາບອກກັບຂ້ອຍວ່າ ຂໍໃຫ້ຂ້ອຍຊ່ວຍ ຂ້ອຍກະຈະຊ່ວຍ ເຖິງບໍ່ຮອດລ້ານໃນຕອນນັ້ນ ຂ້ອຍອາດຈະໃຫ້ໄດ້ 3-4 ແສນກະໄດ້ນາ ຕາມກຳລັງງົບທີ່ຂ້ອຍມີ

ນັບຈາກນັ້ນມາ, ຂ້ອຍກັບລາວບໍ່ໄດ້ຕິດຕໍ່ຫາກັນເລີຍ ນັບຈາກມື້ນັ້ນມາຮອດມື້ນີ້ກະຊິເຂົ້າ 3 ເດືອນແລ້ວ, ເງິນຂ້ອຍກະບໍ່ໄດ້ຄືນ, ບໍ່ໄດ້ຫຍັງທັ່ງນັ້ນ, ແລະ ຂ້ອຍກໍ່ບໍ່ຄິດຈະເອົາອີກ, ຂ້ອຍອຶດອັດຫຼາຍ ບໍ່ຮູ້ຈະໄປລະບາຍກັບໃຜ, ນີ້ຂ້ອຍເປັນຄົນຜິດຫວາ ທີ່ໄປທວງເງິນກັບລາວ ? ຖ້າບໍ່ທວງລະຂ້ອຍຕ້ອງເຮັດແນວໃດ ຕ້ອງປ່ອຍໄປອີກຈັກປີ ? ຂ້ອຍບໍ່ຄິດເລີຍ ການທີ່ໃຫ້ເງິນຊ່ວຍເຫຼືອໝູ່ແບບນີ້ ແລ້ວຈະກັບກາຍມາເປັນການທຳລາຍຄວາມສຳພັນໝູ່ທີ່ສ້າງນຳກັນມາເກືອບ 10 ປີ ພັງລົງໂດຍງ່າຍໆໃນເງິນພຽງຊ່ຳນີ້, ຂ້ອຍຄິດວ່າການປະເມີນຄ່າຂອງຄວາມສຳພັນໃນໝູ່ສະໜິດມັນມີຫຼາຍກວ່າເງິນຈຳນວນນັ້ນ, ນັບຈາກນີ້ໄປຂ້ອຍກະບໍ່ຄິດຈະທວງຫຍັງອີກ ຖືວ່າຂ້ອຍໃຫ້ລາວໄປເລີຍໃນເງິນຈຳນວນນັ້ນ. ແລະ ຂ້ອຍຈະຖືເປັນບົດຮຽນຈື່ໄປຈົນຕາຍວ່າ 2 ຄັ້ງໃນຊີວິດທີ່ເສຍໝູ່ສະໜິດໄປຍ້ອນເອົາເງິນໃຫ້ໝູ່ຢືມຍາມເດືອດຮ້ອນ, ແລະ ຂ້ອຍຈະສັນຍາກັບໂຕເອງວ່າ ນັບແຕ່ນີ້ໄປຂ້ອຍຈະບໍ່ມີການເອົາເງິນໃຫ້ໝູ່ສະໜິດຢືມອີກ ເພາະ ຂ້ອຍບໍ່ຢາກທຳລາຍຄວາມສຳພັນກັບໃຜອີກແລ້ວ

ຂ່າວທົ່ວໄປ