ເສັ້ນທາງຊີວິດຂອງ Sanna Marin ນາຍົກລັດຖະມົນຕີຍິງທີ່ອາຍຸນ້ອຍສຸດໃນໂລກ

ເສັ້ນທາງຊີວິດຂອງ Sanna Marin ນາຍົກລັດຖະມົນຕີຍິງທີ່ອາຍຸນ້ອຍສຸດໃນໂລກ

ເສັ້ນທາງຊີວິດຂອງ Sanna Marin ນາຍົກລັດຖະມົນຕີຍິງທີ່ອາຍຸນ້ອຍສຸດໃນໂລກ . ຕອນອາຍຸ 34 ປີ ເຮົາເບິ່ງເຫັນໂຕເອງຢູ່ໃນຊ່ວງໃດຂອງຊີວິດການເຮັດວຽກງານ?.

ສຳລັບທ່ານ Sanna Marin ໃນອາຍຸ 34 ປີ ລາວໄດ້ຮັບຕຳແໜ່ງ “ຜູ້ນຳ” ບໍ່ແມ່ນຜູ້ນຳທຳມະດາ ແຕ່ເປັນຜູ້ນຳຂອງປະເທດ ທີ່ຂຶ້ນຊື່ວ່າປະຊາກອນມີຄວາມສຸກອັນດັບຕົ້ນໆຂອງໂລກ

ເສັ້ນທາງຊີວິດຂອງທ່ານນາງ Sanna Marin ຈະໜ້າສົນໃຈສໍ່າໃດ ? ເຮົາໄປຮັບຮູ້ນຳກັນເລີຍ!

ປັດຈຸບັນນາງ Sanna Marin ອາຍຸພຽງ 35 ປີເທົ່ານັ້ນ, ໂດຍລາວໄດ້ເຂົ້າມາຮັບຕຳແໜ່ງນາຍົກລັດຖະມົນຕີຂອງປະເທດຟິນແລນ ເມື່ອເດືອນທັນວາ 2019

ເວົ້າໄດ້ວ່າພໍເຂົ້າມາເລີ່ມວຽກບໍ່ເທົ່າໃດອາທິດ ນາງກໍຕ້ອງພົບກັບຄວາມທ້າທາຍຄັ້ງໃຫຍ່ ເຊິ່ງກໍຄືການຮັບມືກັບວິກິດໂລກລະບາດໃນທັນທີ. ແນວໃດກໍຕາມ ຟິນແລນ ກໍຖືເປັນປະເທດທີ່ຮັບມືກັບສະຖານະການນີ້ໄດ້ຂ້ອນຂ້າງດີເລີຍ!

ຖ້າເບິ່ງຈາກອັດຕາການຮັບວັກຊີນ ຈະມີປະຊາຊົນອາຍຸ 18 ປີຂຶ້ນໄປ ທີ່ໄດ້ຮັບວັກຊີນຢ່າງນ້ອຍ 1 ໂດສ ປະມານ 76.7% ເຊິ່ງສູງກວ່າອັດຕາສະເລ່ຍຂອງພູມິພາກເອີລົບເຊິ່ງຢູ່ທີ່ປະມານ 65.8%. ແລະເຖິງວ່າປະລິມານຜູ້ຕິດເຊື້ອລາຍໃໝ່ຕໍ່ມື້ ຈະຍັງຢູ່ທີ່ປະມານ 300-400 ຄົນ ໃນເດືອນກໍລະກົດ ແຕ່ອັດຕາການເສຍຊີວິດ ຫລຸດລົງເຫຼືອບໍ່ເຖິງ 5 ຄົນຕໍ່ອາທິດ

ນອກຈາກນັ້ນຟິນແລນ ຍັງເລີ່ມເປີດຮັບນັກທ່ອງທ່ຽວ ທີ່ຈະເດີນທາງເຂົ້າປະເທດແລ້ວບາງສ່ວນ ພາຍໃຕ້ຂໍ້ກຳນົດ ເຊັ່ນ ມາຈາກປະເທດທີ່ມີອັດຕາການຕິດເຊື້ອຕ່ຳ ຫລືໄດ້ຮັບວັກຊີນຄົບແລ້ວ. ນີ້ກໍຖືເປັນເລື່ອງທີ່ພິສູດຄວາມສາມາດໃຫ້ກັບທ່ານນາງ Sanna Marin ນາຍົກຂອງຟິນແລນໄດ້ເປັນຢ່າງດີ.

ຄວາມຈິງແລ້ວ, ການທີ່ຟິນແລນມີນາຍົກລັດຖະມົນຕີທີ່ເປັນຜູ້ຍິງ ກໍບໍ່ແມ່ນເລື່ອງແປກຫຍັງ? ເພາະທ່ານນາງ Sanna Marin ກໍເປັນຜູ້ຍິງຄົົນທີ 4 ທີ່ເຂົ້າຮັບຕຳແໜ່ງນີ້. ແລ້ວອິຫຍັງເຮັດໃຫ້ທ່ານນາງຫັນມາສົນໃຈເລື່ອງການເມືອງ ?

ສຳລັບຊີວິດຂອງ Sanna Marin ລາວເຕີບໂຕມາໃນຄອບຄົວ LGBTQ+ ເພາະຫຼັງຈາກທີ່ແມ່ຢ່າຂາດຈາກພໍ່ທີ່ມີບັນຫາຕິດເຫລົ້າ ລາວກໍຖືກລ້ຽງດູໂດຍແມ່ແລະພາດເນີທີ່ເປັນຜູ້ຍິງອີກຄົນໜຶ່ງ.

ນາງ Sanna Marin ເລົ່າວ່ານາງບໍ່ເຄີຍຝັນວ່າ ໃຫຍ່ຂຶ້ນມາແລ້ວຈະເປັນນາຍົກລັດຖະມົນຕີ ສ່ວນອາຊີບນັກການເມືອງກໍຖືວ່າໄກຕົວຫລາຍ ເພາະຖານະຂອງບ້ານ ກໍຢູ່ໃນ “ຊົນຊັ້ນແຮງງານ”.

ນາງ Sanna Marin ຖືເປັນຄົນທຳອິດຂອງຄອບຄົວເລີຍ ທີ່ໄດ້ເຂົ້າຮຽນໃນມະຫາວິທະຍາໄລ ລາວຈົບການສຶກສາລະດັບປະລິນຍາຕີແລະໂທ ຈາກ University of Tampere ໃນສາຂາ Administrative Sciences ຫລືວິທະຍາສາດການບໍລິຫານ.

ແນວໃດກໍຕາມສ່ວນຫນຶ່ງທີ່ເຮັດໃຫ້ນາງມາສົນໃຈການເມືອງກໍຄື ການທີ່ Sanna Marin ເຕີບໂຕມາໃນຄອບຄົວສີລຸ້ງ ລວມທັງນາງຮູ້ສຶກວ່າຄົນລຸ້ນກ່ອນໆ ຍັງບໍ່ໄດ້ໃຫ້ຄວາມສຳຄັນກັບການແກ້ບັນຫາໃຫຍ່ໆ ໃນອະນາຄົດເທົ່າໃດ?

ດັ່ງນັ້ນຫນ້າທີ່ນີ້ຈຶ່ງຈະຕົກເປັນຂອງໃຜໄປບໍ່ໄດ້ ນອກຈາກ Sanna Marin ເອງ. ໂດຍຊີວິດການເມືອງຂອງນາງເລີ່ມຕົ້ນຈາກການເຂົ້າຮ່ວມເປັນສະມາຊິກຂອງພັກ Social Democratic Youth ໃນປີ 2006 ຈາກນັ້ນ 4 ປີ ນາງກໍສາມາດໄຕ່ເຕົ້າຂຶ້ນເປັນຮອງຫົວໜ້າພັກ ດ້ວຍອາຍຸພຽງ 25 ປີເທົ່ານັ້ນ.

ຕໍ່ມາພໍອາຍຸໄດ້ 27 ປີ Sanna Marin ກໍໄດ້ຮັບເລືອກຕັ້ງເຂົ້າສູ່ສະພາຂອງເມືອງ Tampere ແລະກ້າວເຂົ້າສູ່ລັດຖະສະພາເຮັດຫນ້າທີ່ບໍລິຫານປະເທດ ດ້ວຍອາຍຸ 30 ປີ. ກ່ອນຈະເຂົ້າຮັບຕຳແໜ່ງນາຍົກລັດຖະມົນຕີຂອງຟິນແລນ ໃນປີ 2019 ດ້ວຍອາຍຸ 34 ປີ ເຊິ່ງຖືວ່າເປັນຜູ້ຍິງທີ່ອາຍຸນ້ອຍສຸດໃນໂລກ ທີ່ເຂົ້າຮັບຕຳແໜ່ງນີ້ Sanna Marin ມີນະໂຍບາຍບໍລິຫານປະເທດແບບກ້າວໜ້າ ໃຫ້ຄວາມສຳຄັນເລື່ອງຄວາມເທົ່າທຽມທາງເພດ

ເຖິງວ່າຟິນແລນຈະຂຶ້ນຊື່ວ່າເປັນປະເທດທີ່ມີຄວາມເທົ່າທຽມທາງເພດສູງ ແຕ່ກໍບໍ່ໄດ້ແປວ່າຈະບໍ່ມີຊ່ອງຫວ່າງລະຫວ່າງເພດຢູ່ເລີຍ ຍົກຕົວຢ່າງເຊັ່ນ ຄ່າຈ້າງຂອງຜູ້ຍິງຈະຢູ່ທີ່ 0.83 ຢູໂຣ ໃນຂະນະທີ່ຜູ້ຊາຍຈະຢູ່ທີ່ 1 ຢູໂຣ. ແລະນາງຍັງຕ້ອງການຊຸກດັນເລື່ອງການເຮັດວຽກງານ 4 ມື້ ເພື່ອທີ່ຈະໃຫ້ຄອບຄົວສາມາດໃຊ້ເວລາຮ່ວມກັນໄດ້ຫລາຍຂຶ້ນດ້ວຍ

ນອກຈາກນັ້ນ, Sanna Marin ກໍໃຫ້ຄວາມສຳຄັນກັບບັນຫາໂລກຮ້ອນ ມີການຕັ້ງເປົ້າໃຫ້ຟິນແລນເປັນປະເທດທີ່ຫລຸດການປ່ອຍກາກບອນສຸດທິໃຫ້ເປັນສູນ ພາຍໃນປີ 2035 ຜ່ານການວາງໂຄງສ້າງພື້ນຖານກ່ຽວກັບການຂົນສົ່ງ ລວມເຖິງການໃຊ້ພະລັງງານໝູນວຽນ. ເຊິ່ງຖ້າເປັນໄປຕາມແຜນ ຟິນແລນກໍຈະກາຍເປັນປະເທດທຳອິດຂອງໂລກ ທີ່ສາມາດເຮັດເລື່ອງນີ້ໃຫ້ສຳເລັດໄດ້

ແນວໃດໃດກໍຕາມ ຫຼັງຈາກທີ່ນາງເຂົ້າຮັບຕຳແໜ່ງໄດ້ພຽງບໍ່ເທົ່າໃດອາທິດ ຟິນແລນກໍພົບຜູ້ຕິດເຊື້ອໂຄວິດ 19 ເຄສທຳອິດໃນປະເທດ. Sanna Marin ແລະທີມສາມາດຮັບມືກັບສະຖານະການການລະບາດນີ້ໄດ້ດີ ໂດຍສາເຫດຂອງເລື່ອງນີ້ ກໍມາຈາກການປະກາດມາດຕະການລັອກດາວວ່ອງໄວ ຕັ້ງແຕ່ຊ່ວງກາງເດືອນມີນາ 2020 ເຊິ່ງໂຕເລກຜູ້ຕິດເຊື້ອຍັງບໍ່ເຖິງ 300 ຄົນ.

ຈຸດເດັ່ນທີ່ດີຂອງ Sanna Marin ທີ່ຊ່ວຍໃຫ້ນາງສາມາດຈັດການວິກິດເທື່ອນີ້ໄປໄດ້ ກໍຄືຄວາມສາມາດໃນການສື່ສານ ແລະການຍອມຮັບຟັງຄວາມເຫັນຈາກຜູ້ຊ່ຽວຊານ. ເອີ້ນໄດ້ວ່າເປັນອີກໜຶ່ງຜູ້ນຳ ທີ່ພາປະເທດໃຫ້ຜ່ານພົ້ນວິກິດເທື່ອນີ້ໄປໄດ້ ຈາກງານວິໄຈຈາກ University of Reading ພົບວ່າ ປະເທດທີ່ມີຜູ້ນຳເປັນຜູ້ຍິງ ສາມາດຈັດການບັນຫາຈຳນວນຜູ້ເສຍຊີວິດແລະຜູ້ຕິດເຊື້ອໂຄວິດ 19 ໄດ້ດີກວ່າ.

ເນື່ອງຈາກ “ຜູ້ນຳຍິງ” ມັກຈະໃຫ້ຄວາມສຳຄັນກັບຊີວິດຄົນ ຫລາຍກວ່າຜົນຂ້າງຄຽງກ່ຽວກັບເສດຖະກິດ ແລະພວກນາງຍັງມີການຕັດສິນໃຈ ວ່ອງໄວແລະສຽບຂາດຢິ່ງຂຶ້ນ ຫາກເປັນເລື່ອງທີ່ກ່ຽວພັນກັບເລື່ອງຄວາມເປັນຄວາມຕາຍ. ແລະທີ່ໜ້າສົນໃຈຄື ຜູ້ນຳທີມບໍລິຫານປະເທດຂອງຟິນແລນ ບໍ່ໄດ້ມີ Sanna Marin ພຽງຄົນດຽວ ແຕ່ພັກການເມືອງຝ່າຍລັດຖະບານຂອງນາງທັງ 5 ພັກ ລ້ວນແຕ່ມີຫົວໜ້າພັກເປັນ “ຜູ້ຍິງ” ທັງໝົດ.

ທີ່ສຳຄັນ 4 ໃນ 5 ຄົນນັ້ນ ຍັງມີອາຍຸບໍ່ເຖິງ 40 ປີ. ເອີ້ນໄດ້ວ່າຟິນແລນກຳລັງເປັນປະເທດທີ່ຂັບເຄື່ອນດ້ວຍຄົນລຸ້ນໃໝ່ແລະຜູ້ຍິງຢ່າງແທ້ຈິງ ! ແລະນີ້ກໍອາດຈະເປັນໜຶ່ງໃນເຄັດລັບການບໍລິຫານປະເທດຂອງ Sanna Marin ນາຍົກຍິງທີ່ໄດ້ຊື່ວ່າອາຍຸນ້ອຍທີ່ສຸດໃນໂລກ ກໍເປັນໄດ້..

ຂ່າວທົ່ວໄປ