ຄູຝຶກທີມຊາດຫວຽດນາມ ບໍ່ສົນສຶກສາເກມທີມຊາດລາວ ກ່ອນພົບກັນ ໃນນັດທຳອິດ AFF Suzuki cup 2020

ຄູຝຶກທີມຊາດຫວຽດນາມ ບໍ່ສົນສຶກສາເກມທີມຊາດລາວ ກ່ອນພົບກັນ ໃນນັດທຳອິດ AFF Suzuki cup 2020

ໃນຕອນທ່ຽງຂອງ ເວລາ 12:00 ຂອງວັນທີ 4 ທັນວາ 2021 ນີ້ໄດ້ມີການໃຫ້ສຳພາດຂອງບັນດາຄູຝຶກຂອງ ປະເທດທີເຂົ້າຮ່ວມແຂ່ງຂັນໃນລາຍການ AFF Suzuki cup 2020 ກຸ່ມ B ທີ່ປະເທດສິງກະໂປເປັນເຈົ້າພາບໃນການຈັດການແຂ່ງຂັນຄັ້ງນີ້.

ໃນພິທີຖະແຫຼງຂ່າວ ຄູຝຶກທີມຊາດຫວດຽດນາມ ທ່ານ ປາກຮັງ ໂຊ(Park Hang Seo) ຊາວເກົາຫຼີໃຕ້ ໄດ້ກ່າວວ່າໃນນັດທຳອິດທີ່ຈະພົບກັບທີມຊາດລາວ ຂ້ອຍບໍ່ໄດ້ເບິ່ງຟອມຂອງທີມຊາດລາວມາກ່ອນ ແລະ ຂ້ອຍກະບໍ່ໄດ້ຮູ້ຈັກຜູ້ຫຼິ້ນຂອງທີມຊາດລາວ, ເຮົາຈະໄປວັດກັນໃນສະໜາມ.

ເມື່ອນັກຂ່າວຈາກ Lao sport news ຖາມຄູຝຶກທີມຊາດລາວ ທ່ານ ວີ ຊີວາຣາຊ(V. Selvaraj) ຊາວສິງກະໂປວ່າ ນັບຕັ້ງແຕ່ປີ 2009 ເປັນຕົ້ນມາທີມຊາດລາວຖືໄດ້ວ່າເກືອບເປັນຮອງທຸກໆທີມໃນເວລາລົງສະໜາມ ແລະ ແຟນບານລາວ ຫຼາຍຄົນກໍ່ໃຫ້ຄຳເຫັນວ່າ ທີມຊາດຊຸດ AFF Suzuki cup 2020 ເປັນຊຸດທີ່ດີທີ່ສຸດຂອງລາວນັບແຕ່ປີ 2009, ສຳລັບທ່ານແລ້ວການແຂ່ງຂັນໃນລາຍການນີ້ທ່ານມີຄວາມຄິດເຫັນແນວໃດ?

ທ່ານ ຊີວາຣາຊ ກ່າວວ່າ ຂ້າພະເຈົ້າເຫັນດີກັບຄຳເວົ້າຂອງທ່ານທີ່ວ່າ ທີມຊຸດນີ້ເປັນທີມທີ່ດີທີ່ສຸດທີ່ລາວເຄີຍຄຸມມາ ແຕ່ວ່າ ເກມກັບຫວຽດນາມເປັນເກມທີ່ພວກເຮົາຕ້ອງໄດ້ຫຼິ້ນແບບລະມັດລະວັງ ແລະ ພວກເຮົາຈະສ້າງຜົນງານໃຫ້ດີທີ່ສຸດ.
ສຳລັບການແຂ່ງຂັນລາຍການນີ້ຫຼາຍສຳນັກຂ່າວກໍ່ໃຫ້ຄວາມສຳຄັນໄປທີ່ທີມ ຫວຽດນາມທີ່ເຂົ້າຮ່ວມແຂ່ງຂັນໃນນາມ ທີມແຊ້ມເກົ່າເປັນພິເສດ ລອງລົງມາກໍ່ເປັນທີມຈາກມາເລເຊຍ. ເຊິ່ງສະແດງອອກໃນເວລາຖາມຄຳຖາມຂອງສື່ມວນຊົນຄູຝຶກຂອງ 2 ຊາດນີ້ຈະຖືກຖາມຫຼາຍທີ່ສຸດ ແລະ ທີມຊາດລາວເອງ ເບີ່ງອີກຢ່າງໜຶ່ງກາຍເປັນທີມນອກສາຍຕາໄປແລ້ວເພາະບໍ່ມີນັກຂ່າວຕ່າງຊາດສຳນັກໃດເລີຍຖາມກ່ຽວກັບລາວ.

ຫວັງຢ່າງຍິ່ງວ່າການຖືກເມີນເສີຍແບບນີ້ຈະເປັນແຮງພະລັງດ້ານບວກເຮັດໃຫ້ທີມງານຄູຝຶກ ແລະ ນັກກິລາ ເພື່ອສ້າງຜົນງານອັນໂດດເດັ່ນເຮັດໃຫ້ວົງການ ບານເຕະອາຊຽນຕ້ອງໄດ້ກັບມາໃຫ້ຄວາມສົນໃຈຕໍ່ວົງການບານເຕະລາວອີກຄັ້ງ.

ສຳລັບການແຂ່ງຂັນລາຍການນີ້ມີທັງໝົດ 10 ປະເທດເຂົ້າຮ່ວມ ມີພຽງມາເລເຊຍປະເທດດຽວທີ່ໃຊ້ຄູຝຶກຄົນປະເທດຕົນເອງ, ນອກນັ້ນກໍ່ມີພຽງປະເທດລາວ ແລະ ມາເລເຊຍ ທີ່ໃຊ້ຄູຝຶກຈາກປະເທດອາຊຽນ.

ເຖິງຢ່າງໃດກໍ່ຕາມພວກເຮົາກຽມພິສູດຜົນງານ ແລະ ຊ່ວຍກັນສົ່ງແຮງໃຈໃຫ້ກຳລັງໃຈທີມຊາດລາວເຮົາທີ່ຈະລົງສະໜາມນັດທຳອິດພົບກັບທີມຊາດ ຫວຽດນາມ ວັນຕອນແລງວັນຈັນ ວັນທີ 06 ທັນວາ 2021, ເວລາ 19:30 ນີ້.

ຈາກນັ້ນລາວເຮົາມີຄິວພົບກັບ ທີມຊາດ ມາເລເຊຍ ໃນວັນທີ 09 ທັນວາ 2021 ເວລາ 16:30 ພົບກັບ ທີມຊາດ ອິນໂດເນເຊຍ ໃນວັນທີ 12 ທັນວາ 2021 ເວລາ 16:30

ພົບກັບ ທີມຊາດ ກຳປູເຈຍ ໃນວັນທີ 15 ທັນວາ 2021 ເວລາ 16:30

ຫວັງຢ່າງຍິ່ງວ່າ ການແຂ່ງຂັນລາຍການນີ້ຈະເປັນການກອບກູ້ກຽດສັກສີຂອງ ທີມຊາດລາວໃນວົງການບານເຕະອາຊຽນກັບຄືນມາ.

ຂ່າວທົ່ວໄປ