ຊົມເຊີຍ ໂຄງການກໍ່ສ້າງໂຮງໝໍມະໂຫສົດ ໄລຍະທີ 1 ຄືບໜ້າແລ້ວ 80%

ຊົມເຊີຍ ໂຄງການກໍ່ສ້າງໂຮງໝໍມະໂຫສົດ ໄລຍະທີ 1 ຄືບໜ້າແລ້ວ 80%

ໂຄງການກໍ່ສ້າງໂຮງໝໍມະໂຫສົດຫຼັງໃໝ່ ເປັນໂຄງການຊ່ວຍເຫຼືອຈາກ ສປ ຈີນ ມູນຄ່າການກໍ່ສ້າງ 590 ລ້ານກວ່າຢວນ ຫຼື ປະມານ 751,8 ຕື້ກີບ ໂດຍໄດ້ແບ່ງອອກເປັນສອງໄລຍະ.

ປັດຈຸບັນ ການກໍ່ສ້າງໃນໄລຍະທີ 1 ໄດ້ສຳເລັດແລ້ວ 80% ຄາດວ່າຈະສໍາເລັດ 100% ໃນເດືອນ ມັງກອນ ປີ 2021 ແລະ ຈະເລີ່ມລົງມືກໍ່ສ້າງໃນໄລຍະທີ 2 ໃນເດືອນເມສາ ປີ 2021 ແລະ ຄາດວ່າຈະໃຫ້ສຳເລັດທັງໝົດໃນເດືອນມີນາປີ 2022.

 

ທ່ານ ຫວັງ ຊີກາງ (Wang Zhi Gang) ຫົວໜ້າທີມງານເຕັກນິກ ບໍລິສັດ Beijing Uni-Construction Group Co., Ltd ໄດ້ເປີດເຜີຍຕໍ່ສື່ມວນຊົນເມື່ອວັນທີ 23 ທັນວາ ຜ່ານມາ ວ່າ: ໂຄງການກໍ່ສ້າງໂຮງໝໍມະໂຫສົດ, ມີເນື້ອທີ່ທັງໝົດ 30.300 ຕາແມັດ. ໂຄງການນີ້ມີຄວາມໝາຍສໍາຄັນຕໍ່ການພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນຈີນ ແລະ ປະຊາຊົນລາວ, ຜູ້ນຳຂອງສອງປະເທດ ຮ່ວມວາງສີລາລືກ ໃນວັນທີ 14 ພະຈິກ 2017 ແລະ ເປັນໂຮງໝໍທີ່ມີຂະໜາດໃຫຍ່ທີ່ສຸດ, ມີ 600 ຕຽງນອນ, ໂດຍຈະຕິດຕັ້ງລະບົບທັນສະໄໝຄົບຊຸດ ບໍ່ວ່າຈະເປັນໄຟຟ້າ, ນ້ຳປະປາ ຕະຫຼອດຮອດລະບົບຄວບຄຸມອື່ນໆ ລ້ວນແຕ່ເປັນລະບົບທັນສະໄໝ.

 

ໂຄງການກໍ່ສ້າງດັ່ງກ່າວ ມີມູນຄ່າ 590 ລ້ານກວ່າຢວນ ເປັນໂຄງການທີ່ລົງທຶນຫຼາຍກວ່າໝູ່ ຂອງການຊ່ວຍເຫຼືອລ້າຈາກລັດຖະບານຈີນ. ໂຄງການດັ່ງກ່າວແບ່ງອອກເປັນ 2 ໄລຍະ ຄື: ໄລຍະທີ່ 1 ແມ່ນພາກສ່ວນໃຕ້ດິນເປັນບ່ອນຈອດລົດ, ຕຶກນອນຄົນເຈັບເປັນອາຄານ 8 ຊັ້ນ, ຕຶກຊຶມເຊື້ອ 6 ຊັ້ນ ທີ່ມີການສ້າງເພື່ອຮອງຮັບການລົງຈອດຂອງເຮລີຄ໊ອບເຕີ ທີ່ສາມາດຮອງຮັບນ້ຳ ໜັກ 6 ໂຕນ ແລະ ໄລຍະທີ່ 2 ແມ່ນພາກສ່ວນໃຕ້ດິນທີ່ຍັງເຫຼືອ, ຕຶກບໍລິຫານ ແລະ ວິຊາການ, ຕຶກເຕັກນິກການແພດ.

ສ່ວນຕຶກສຸກເສີນ ແລະ ຕຶກແມ່ ແລະ ເດັກ ແມ່ນຮັກສາໄວ້ຄືເກົ່າ, ເມື່ອກໍ່ສ້າງສໍາເລັດແລ້ວ ຈະກາຍເປັນໂຮງໝໍໃຫຍ່ທີ່ສຸດ, ມີເຄື່ອງຈັກ-ອຸປະກອນຄົບຊຸດ ແລະ ທັນສະໄໝທີ່ສຸດ ແລະ ມີມາດຕະຖານສູງທີ່ສຸດ ໃນ ສປປ ລາວ, ພ້ອມທັງເປັນສູນກາງການຝຶກອົບຮົມ ແລະ ຄົ້ນຄວ້າວິທະຍາສາດການແພດທີ່ສໍາຄັນທີ່ສຸດຂອງ ສປປ ລາວ.

 

ທ່ານ ຫວັງ ຊີກາງ ຍັງໃຫ້ຮູ້ອີກວ່າ: ໃນໄລຍະດຳເນີນການກໍ່ສ້າງ ຕ້ອງຮັບປະກັນໃຫ້ໂຮງໝໍດໍາເນີນການບໍລິການຄົນເຈັບເປັນປົກກະຕິ ເຊິ່ງເປັນການກໍ່ສ້າງຢູ່ໃນອາຄານສະຖານທີ່ເກົ່າ ຕ້ອງທຸບມ້າງອາຄານເກົ່າອອກ ແລ້ວຈຶ່ງສ້າງຕຶກໃໝ່, ແຕ່ເວລາການກໍ່ສ້າງມີແຕ່ 36 ເດືອນ, ເມື່ອໄລຍະທີ່ 1 ສໍາເລັດແລ້ວ ແມ່ນຈະເຄື່ອນຍ້າຍການບໍລິການ ແລະ ຄົນເຈັບມາເຂົ້ານໍາໃຊ້ຢູ່ຕຶກໃໝ່ ແລ້ວຈຶ່ງດໍາເນີນການກໍ່ສ້າງໄລຍະທີ່ 2 ໄດ້ ຊຶ່ງຂໍ້ຫຍຸ້ງຍາກຂອງການກໍສ້າງແມ່ນຂຸດຂຸມໃນລະດູຝົນແມ່ນບໍ່ໄດ້, ດ້ານທີ່ຕັ້ງໂຄງການ ກໍໃກ້ກັນກັບຫໍປະທານປະເທດ, ສະຖານທູດ ຝຣັ່ງ.

ດັ່ງນັ້ນ, ໃນເວລາການກໍ່ສ້າງຕ້ອງຫຼຸດຜ່ອນສຽງ ແລະ ການກຳຈັດຂີ້ຝຸ່ນ ພ້ອມທັງຮັກສາຄວາມສະອາດຖະໜົນອ້ອມຂ້າງ, ພື້ນທີ່ຂອງໂຄງການແມ່ນແຄບ ບໍ່ສະດວກຕໍ່ການຈັດວາງອຸປະກອນ ແລະ ວັດສະດຸການກໍ່ສ້າງ. ອີກດ້ານໜຶ່ງ, ຜົນກະທົບຈາກການລະບາດພະຍາດໂຄວິດ-19

 

ເຮັດໃຫ້ວິຊາການ, ວັດຖຸດິບ ແລະ ວັດສະດຸກໍ່ສ້າງບໍ່ສາມາດນຳເຂົ້າມາບໍ່ໄດ້ໃນໄລຍະໜຶ່ງ, ເຮັດໃຫ້ວຽກກໍ່ສ້າງຂອງໄລຍະທີ 1 ໄດ້ເລື່ອນເວລາອອກເປັນຫຼາຍມື້ ເຮັດໃຫ້ກໍ່ບໍ່ທັນເວລາທີ່ກຳນົດໄວ້, ແຕ່ເຖິງແນວໃດກໍຕາມກຸ່ມເຕັກນິກການກໍ່ສ້າງກໍາລັງຈັດວິສາວະກອນ ແລະ ວັດຖຸດິບເຂົ້າພາກສະໜາມ, ເພື່ອຍາດເວລາເຮັດໃຫ້ໂຄງການສໍາເລັດ ແລະ ເປີດໃຊ້ບໍລິການ ຊຶ່ງປັດຈຸບັນ ການກໍ່ສ້າງໃນໄລຍະທີ 1 ໄດ້ສໍາເລັດແລ້ວ 80% ຄາດວ່າຈະສໍາເລັດ 100% ໃນເດືອນກຸມພາ ປີ 2021,

 

ຫຼັງຈາກນັ້ນຈະເລີ່ມລົງມືກໍ່ສ້າງໃນໄລຍະທີ 2 ໃນເດືອນເມສາ ປີ 2021 ແລະ ຄາດວ່າ ຈະໃຫ້ສຳເລັດທັງໝົດໃນເດືອນມີນາປີ 2022.

(ຂ່າວ: ສຸກສະຫວັນ, ພາບ: ແສງຈັນ)

ຮຽບຮຽງ ໃໝ່ : ພອນໄຊ.

 

ຂ່າວທົ່ວໄປ