ຕຳຫຼວດຫວຽດນາມຢຶດແມວແຊ່ແຂງ 600 ກິໂລກຣາມຈາກລົດທົວ

ຕຳຫຼວດຫວຽດນາມຢຶດແມວແຊ່ແຂງ 600 ກິໂລກຣາມຈາກລົດທົວ

ສຳນັກຂ່າວຂອງຫວຽດນາມລາຍງານວ່າ ເມື່ອວັນທີ 14 ມັງກອນ 2020 ຕຳຫຼວດເມືອງ ຄີອັນ ແຂວງ ຫ່າຕີ໋ງ ຂອງຫວຽດນາມ ໄດ້ຈັບກຸມຕົວຜູ້ກ່ຽວຂ້ອງກັບການລັກລອບຂົນສົ່ງແມວແຊ່ແຂງກວ່າ 600 ກິໂລກຣາມ ໂດຍແມວດັ່ງກ່າວຖືກບັນຈຸໃສ່ໃນກ່ອງໂຟມຈຳນວນ 6 ກ່ອງ ທີ່ຖືກຊຸກເຊື່ອງໄວ້ໃນລົດທົວທີ່ແລ່ນລະຫວ່າງພາກໃຕ້ ຫາ ພາກເໜືອຂອງຫວຽດນາມ.

ເຈົ້າໜ້າທີ່ຕຳຫຼວດເປີດເຜີຍວ່າ ພາຍໃນກ່ອງດັ່ງກ່າວມີແມວປະມານ 120 ໂຕ ໂດຍແບ່ງເປັນກ່ອງລະ 20 ໂຕ ໂດຍແມວແຕ່ລະໂຕມີນໍ້າໜັກປະມານ 5 ກິໂລກຣາມ

ລົດທົວຄັນດັ່ງກ່າວບັນທຸກຜູ້ໂດຍສານຈຳນວນ 40 ຄົນ. ທ້າວ ດັງ ຟານດວງ ຄົນຂັບລົດກ່າວວ່າ ເມື່ອລົດທົວໄປຮອດແຂວງ ດົ່ງເທບບໍລິເວນສາມຫຼ່ຽມປາກແມ່ນໍ້າຂອງ ເຂົາໄດ້ຮັບການຕິດຕໍ່ໃຫ້ນຳກ່ອງໂຟມໄປສົ່ງທີ່ແຂວງໄທບິນ ແລະ ຈະມີຄົນມາຮັບເອົາກ່ອງດັ່ງກ່າວເມື່ອເຖິງຈຸດໝາຍ ແລະ ເຂົາໄດ້ຢືນຢັນວ່າ ເຂົາບໍ່ຮູ້ວ່າໃນກ່ອງໂຟມເຫຼົ່ານີ້ມີສິ່ງໃດຢູ່ທາງໃນ.

ທາງເຈົ້າໜ້າທີ່ຕຳຫຼວດລະບຸວ່າ ທ້າວ ຫງຽນ ຟານດິນ ເຈົ້າຂອງລົດທົວ ແລະ ທ້າວ ດັງ ຟານດວງຄົນຂັບລົດຍັງບໍ່ສາມາດສົ່ງເອກະສານຢືນຢັນລະບຸທີ່ມາຂອງກ່ອງໂຟມເຫຼົ່ານີ້ໄດ້ເທື່ອ ຈຶ່ງໄດ້ຄວບຄຸມຕົວເພື່ອສອບສວນເຖິງທີ່ໄປທີ່ມາຂອງກ່ອງຕໍ່ໄປ.

ຕາມກົດໝາຍຂອງຫວຽດນາມ ພັດສະດຸ ຫຼື ສິ່ງຂອງທີ່ບໍ່ລະບຸຜູ້ຈັດສົ່ງນັ້ນຖືວ່າຜິດກົດໝາຍການຂົນສົ່ງ ແຕ່ໃນຫວຽດນາມບໍ່ໄດ້ມີກົດໝາຍທີ່ຫ້າມຂ້າ, ຂາຍ ຫຼື ກິນຊີ້ນແມວ ແລະ ໝາ. ທີ່ຜ່ານມາລັດຖະບານຫວຽດນາມພະຍາຍາມລົນນະລົງບໍ່ໃຫ້ປະຊາຊົນບໍລິໂພກຊີ້ນແມວ ແລະ ໝາ ແຕ່ກໍ່ບໍ່ສາມາດຫ້າມໄດ້ ໃນຂະນະທີ່ຮ້ານອາຫານຕ່າງໆຍັງມີການເສີບເມນູທີ່ເຮັດຈາກຊີ້ນແມວ, ໝາ ແລະ ສ່ວນໃຫຍ່ຈະເປັນຊີ້ນແມວທີ່ນຳເຂົ້າຈາກປະເທດຈີນ.

 

ຂ່າວທົ່ວໄປ