ບັນດາແມ່ຄ້າຕອບກັບ ບໍ່ສາມາດຂາຍຕາມລາຄາທີ່ພະແນກອຸດສາຫະກຳ ແລະ ການຄ້າ ກຳນົດໄວ້ໄດ້

ບັນດາແມ່ຄ້າຕອບກັບ ບໍ່ສາມາດຂາຍຕາມລາຄາທີ່ພະແນກອຸດສາຫະກຳ ແລະ ການຄ້າ ກຳນົດໄວ້ໄດ້

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ອອກແຈ້ງການໃນບໍ່ດົນມານີ້ ເຖິງ ຜູ້ອຳນວຍການສູນການຄ້າ, ຮ້ານສະດວກຊື້, ຫົວໜ່ວຍທຸລະກິດ ຈັດສັນຕະຫຼາດ, ຜູ້ປະກອບການທຸລະກິດ, ຊາວຄ້າ-ຂາຍຢູ່ນະຄອນຫຼວງວຽງຈັນ ວ່າ: ຫ້າມສວຍໂອກາດຂຶ້ນລາຄາສິນຄ້າ ຕາມລຳພັງໃຈ ແລະ ຊື້-ຂາຍ ສິນຄ້າຕ້ອງຫ້າມ ໃນໄລຍະຈັດງານສະເຫຼີມສະຫຼອງສົ່ງທ້າຍປິເກົ່າ 2019 ຕ້ອນຮັບປີໃໝ່ 2020 ເຊິ່ງໄດ້ກຳນົດລາຄາຂາຍຍ່ອຍປະເພດຊີ້ນດັ່ງນີ້: ລາຄາຊີ້ນໝູ ປະເພດ 1 (ຊີ້ນກ້ອນ ແລະ ດູກຂ້າງ ສູງສຸດບໍ່ໃຫ້ເກີນ 36.000 ກີບ/ກິໂລ, ລາຄາຊີ້ນໝູປະເພດ 2 (ສາມຊັ້ນ, ຊີ້ນຕິດມັນ) ສູງສຸດບໍ່ໃຫ້ເກີນ 34.000 ກີບ/ກິໂລ, ລາຄາຊີ້ນງົວ, ຄວາຍ ປະເພດ 1 ສູງສຸດບໍ່ໃຫ້ເກີນ 75.000 ກີບ/ກິໂລ, ລາຄາຊີ້ນງົວ, ຄວາຍ ປະເພດ 2 ສູງສຸດບໍ່ໃຫ້ເກີນ 65.000 ກີບ/ກິໂລ, ລາຄາປານິນກະຊັງ ສູງສຸດບໍ່ໃຫ້ເກີນ 20.000 ກີບ/ກິໂລ.

ແຕ່ປັດຈຸບັນນີ້ພົບວ່າ ຢູ່ຕາມບັນດາຕະຫຼາດ 9 ຕົວເມືອງ ແລະ ຮ້ານຂາຍປະເພດສິນຄ້າດັ່ງກ່າວມີການຂາຍ ເກີນລາຄາ ທີ່ທາງພະແນກ ອຸດສາຫະກຳ ແລະ ການຄ້າ ນະຄອນຫຼວງວຽງຈັນ ກຳນົດ ຫຼື ອອກແຈ້ງການໄວ້ ເຊັ່ນ : ລາຄາຊີ້ນໝູ ປະເພດ 1 ລາຄາຂາຍປະຈຸບັນແມ່ນ 45.000 ກີບ/ກິໂລ, ລາຄາຊີ້ນໝູປະເພດ 2 ແມ່ນ 40.000 ກີບ/ກິໂລ, ລາຄາຊີ້ນງົວ, ຄວາຍ ປະເພດ 1 ແມ່ນ 85.000 ກີບ/ກິໂລ, ລາຄາຊີ້ນງົວ, ຄວາຍ ປະເພດ 2 ແມ່ນ 75.000 ກີບ/ກິໂລ, ລາຄາປານິນກະຊັງ ແມ່ນ 22.000 – 24.000/ກິໂລ ແລ້ວ

ນາງ ວັນໄຊ ອຳພາວັນ ແມ່ຄ້າຂາຍຊີ້ນງົວ-ຄວາຍ ຢູ່ຕະຫຼາດຫົວຂົວ ເມືອງໄຊເສດຖາ ໄດ້ກ່າວຕໍ່ທີມງານຂ່າວວຽງຈັນທາຍ ມື້ວານນີ້ ວັນທີ 29 ທັນວາ 2019 ກ່ຽວກັບການຂາຍ ຊີ້ນງົວ-ຄວາຍ ເກີນລາຄາທີ່ທາງ ພະແນກ ອຸດສາຫະກຳ ແລະ ການຄ້າ ໄດ້ກຳນົດໄວ້ວ່າ : ຂ້າພະເຈົ້າ ກໍ່ບໍ່ຕ່າງຫຍັງກັບແມ່ຄ້າຜູ້ອື່ນໆ ທີ່ຂາຍຊີ້ນປະເພດງົວ-ຄວາຍ ແມ່ນບໍ່ສາມາດຂາຍຕາມລາຄາທີ່ແຈ້ງການໄວ້ໄດ້ ເພາະຊື້ຈາກຜູ້ມາສົ່ງກໍ່ແພງເກີນທີ່ທາງພະແນກອຸດສາຫະກຳ ແລະ ການຄ້າ ກຳນົດໄວ້ແລ້ວ, ຖ້າເປັນການດີຢາກໃຫ້ທາງພະແນກ ໄປກຳນົດຕົ້ນທາງທຳອິດຈະດີກວ່າ ຄືຢູ່ສະຖານທີ່ໂຮງງານຂ້າສັດຕ່າງໆ ບໍ່ແມ່ນມາກວດສອບ ແລະ ກຳນົດຢູ່ຕາມທ້ອງຕະຫຼາດ ຖ້າຮັບມາໃນລາຄາທີ່ສູງເຮົາກໍ່ຕ້ອງຈຳເປັນໄດ້ຂາຍໃນລາຄາທີ່ສູງ.

ທີ່ມາ: ໜັງສືພິມ ວຽງຈັນທາມ

ຂ່າວທົ່ວໄປ