ພິທີບຸນຕັກບາດ ຖວາຍມະຫາທານ ທີ່ ວັດພຣະທາດພຣະບາດໂພນສັນ 2020

ພິທີບຸນຕັກບາດ ຖວາຍມະຫາທານ ທີ່ ວັດພຣະທາດພຣະບາດໂພນສັນ 2020

ວັນທີ 29 ທັນວາ 2020

ພິທີບຸນຕັກບາດ ຖວາຍມະຫາທານ ທີ່ ວັດພຣະທາດພຣະບາດໂພນສັນ ເນື່ອງໃນ ເທດສະການງານບຸນ ໄຫວ້ພຣະພຸດທະບາດໂພນຈິກວຽງງົວ ແລະ ພຣະທາດເຈດີ ເມືອງທ່າພະບາດ ແຂວງບໍລິຄຳໄຊ ໂດຍການເປັນປະທານຝ່າຍສົງ ຂອງ ພຣະຫຼັກຄຳສຸວັນນະສາທານໄຊຍາຈານ (ຄຳປັນ ອິນທະວົງ) ກັມມະການ ສູນກາງອົງການພຸດທະສາສະນາສັມພັນ ແຫ່ງ ສປປ ລາວ, ເຈົ້າຄະນະ ແຂວງບໍລິຄຳໄຊ, ພຣະປຣີຊາ ຄະນະບໍລິຫານງານປະຈຳການ ອພສ ແຂວງ, ພຣະຄຣູບຸນອູ້ມ ເຈົ້າຄະນະ ເມືອງທ່າພະບາດ ແລະ ພຣະສັງຄະເຈົ້າທັງຫຼາຍ ເຂົ້າຮ່ວມໂດຍສັງຄະສາມັກຄີ

ພາຍນອກ ມີ ທ່ານ ປອ. ກອງແກ້ວ ໄຊສົງຄາມ ກັມມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍລິຄຳໄຊ ເປັນປະທານ ພ້ອມດ້ວຍ ຄະນະການນຳຂັ້ນແຂວງ, ເຈົ້າເມືອງ, ການນຳຂັ້ນເມືອງທ່າພະບາດ, ອົງການຈັດຕັ້ງມະຫາຊົນ ພະແນກການ ແລະ ອົງການ, ຫ້ອງການອ້ອມຂ້າງ ຂອງ ແຂວງ, ເມືອງ ຕະຫຼອດເຖິງພຸດທະສາສະນິກະຊົນລາວບັນດາເຜົ່າ ທັງໃນແຂວງບໍລິຄຳໄຊ ແລະ ຈາກນະຄອນຫຼວງວຽງຈັນ ເຂົ້າຮ່ວມ ດ້ວຍຈິດປາສາທະສັດທາ.

ໃນຄັ້ງນີ້ ໄດ້ເມດຕາເຂົ້າຮ່ວມງານບຸນໄຫວ້ຮອຍພຣະພຸດທະບາດໂພນຈິກວຽງງົວ ແລະ ນະມັດສະການພຣະທາດເຈົ້າ ໂດຍ ພຣະຍອດຄຳພັດທະຣະເກສີ (ປອ. ດຳຣົງ ພິມມະຈັກ) ຄະນະບໍລິຫານງານປະຈຳການ, ຫົວໜ້າຫ້ອງການບໍລິຫານງານ ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ພ້ອມດ້ວຍຄະນະ.

ຮອຍພຣະພຸດທະບາດ ແລະ ພຣະທາດເຈດີພຣະບາດໂພນສັນ ເປັນສະຖານທີ່ສັກສິດທີ່ສຸດແຫ່ງໜຶ່ງ ຂອງ ສປປ ລາວ ທີ່ປາກົດມີໃນ ຕຳນານພຣະເຈົ້າລຽບໂລກ, ຕຳນານພຣະອຸຣັງຄະທາດ ທີ່ກ່າວເຖິງ ອົງພຣະສັມມາສັມພຸດທະເຈົ້າຂອງເຮົາ ສະເດັດມາໂຜດເວໄນຍະສັດທັງຫຼາຍ ໃນດິນແດນສຸວັນນະພູມ (ອານາຈັກລ້ານຊ້າງ) ເມື່ອ 2-3 ພັນ ປີ ທີ່ຜ່ານມາ ພຣະອົງໄດ້ສະເດັດມາໂຜດ ພຣະຍາປັບພາຣະນາຄະຣາດ ທີ່ ໂພນສັນ (ວັດໂພນສັນ ແຄມຂອງ) ແລ້ວ ຊົງປະທັບຮອຍພຣະບາດໄວ້ ທີ່ ໂພນຈິກວຽງງົວ ຕາມຄຳຂາບທູນຂໍ ຂອງ ພຣະຍາສຸຂະຫັດຖິນາຄະຣາດ ແລະ ພຣະຍາສັງຂະນາຄະຣາດ ທີ່ແປງກາຍເປັນ ພຣະຍາຊ້າງເຜືອກສີຂາວ ເອົາງວງຈັບດອກບົວສີຂາວ 3 ດອກ ມາທູນຂໍຮອຍພຣະບາດໄວ້ ເພື່ອຈະໄດ້ສັກກາຣະບູຊາ ຂອງ ມວນມະນຸດ ແລະ ເທວະດາທັງຫຼາຍ

ຮອຍພຣະພຸດທະບາດໂພນສັນ ປັດຈຸບັນ ປະດິດສະຖານຢູ່ ວັດພຣະບາດໂພນສັນ ບ້ານທ່າພະບາດ ເມືອງທ່າພະບາດ ແຂວງບໍລິຄຳໄຊ.

ສາທຸ ສາທຸ ສາທຸ

ພາບ+ຂ່າວ: ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ

ຮຽບຮຽນ : ພອນໄຊ

ຂ່າວທົ່ວໄປ