ລະເບີດປາງສົງຄາມແຕກໃສ່ ເສຍຊີວິດ 3 ບາດເຈັບ 2 ທີ່ເມືອງປາກຊ່ອງ

ລະເບີດປາງສົງຄາມແຕກໃສ່ ເສຍຊີວິດ 3 ບາດເຈັບ 2 ທີ່ເມືອງປາກຊ່ອງ

ໃນວັນທີ 3/12/2021 ພະນັກງານເກັບກູ້ລະເບີດເມືອງປາກຊ່ອງ ແຂວງຈຳປາສັກ ໄດ້ລົງເກັບກູ້ລະເບີດທີ່ບໍ່ທັນແຕກ ຢູ່ສວນກະເຟຂອງປະຊາຊົນ ແລະ ໃນຂະນະທີ່ກຳລັງເກັບກູ້ຕາມວຽກງານວິຊາສະເພາະ ລະເບີດໄດ້ແຕກ ເຮັດໃຫ້ມີຜູ້ເສຍຊີວິດທັນທີ 3 ຄົນ ແລະ ບາດເຈັບ 2 ຄົນ

ຕາມການລາຍງານ ໃຫ້ຮູ້ວ່າ: ໃນເວລາປະມານ 9:30 ນາທີ ພະນັກງານເກັບກູ້ລະເບີດ ເມືອງປາກຊ່ອງ ໄດ້ລົງພາກສະໜາມ ເພື່ອເກັບກູ້ລະເບີດຢູ່ສວນກາເຟຂອງ ທ້າວ ຄຳເຜີຍ ປະຊາຊົນບ້ານຫຼັກ 38 ເມືອງປາກຊ່ອງ; ເວລານັ້ນໄດ້ກວດເຫັນລູກລະເບີດຢູ່ພື້ນດິນ

ຈາກນັ້ນ ພະນັກງານເກັບກູ້ລະເບີດ ກໍໄດ້ເກັບກູ້ບະເບີດຕາມຫຼັກການວິຊາສະເພາະ ໃນຂະນະນັ້ນລະເບີດກໍ່ໄດ້ແຕກ ເຮັດໃຫ້ມີຜູ້ເສຍຊີວິດ 3 ຄົນ ຄື: ທ້າວ ວົງໄຊ ອາຍຸ 50 ປີ ຢູ່ບ້ານວັດຫຼວງ, ທ້າວ ຄອນວິໄລ ອາຍຸ 35 ປີ ຢູ່ບ້ານວັດຫຼວງ , ທ້າວ ສິນນະກອນ ອາຍຸ 42 ປີ ຢູ່ບ້ານປາກຊ່ອງ ທັງ 3 ແມ່ນຢູ່ເມືອງປາກຊ່ອງ, ສ່ວນຜູ້ໄດ້ຮັບບາດເຈັບ 2 ຄົນ ມີ ທ້າວ ວັດທອງ ອາຍຸ 35 ປີ ບ້ານພູດິນແດງ ເມືອງປາກຊ່ອງ, ທ້າວພຸດທະໄຊ ອາຍຸ 32 ປີ ບ້ານປາກຊ່ອງ ເມືອງປາກຊ່ອງ ແຂວງຈຳປາສັກ.

ຂໍສະແດງຄວາມເສຍໃຈນໍາຄອບຄົວຜູ້ເສຍຊີວິດ

ຂ່າວທົ່ວໄປ