“ສຸລິໄຊ ສິງສະອາດ” ເຮັດດີທີ່ສຸດແລ້ວ ຂໍໂທດແຟນມວຍທີ່ເຮັດໃຫ້ຜິດຫວັງ

“ສຸລິໄຊ ສິງສະອາດ” ເຮັດດີທີ່ສຸດແລ້ວ ຂໍໂທດແຟນມວຍທີ່ເຮັດໃຫ້ຜິດຫວັງ

ສຸລິໄຊ ສິງສະອາດ ນັກມວຍລາວໜຶ່ງດຽວຂອງລາວ ທີ່ຊະນະນັກມວຍຫວຽດນາມ ໃນຮອບຮອງ ຫຼຸດເຂົ້າມາເຖິງຮອບຊີງຊະນະເລີດ ຫຼຶ ຊີງຫຼຽນຄຳ ໃນຮຸ່ນນໍ້າໜັກ 45 ກິໂລກຣາມ ໂດຍໂຄຈອນມາພົບກັບນັກມວຍມາເລເຊຍ ທີ່ເອົາຊະນະນ໋ອກນັກມວຍເຈົ້າພາບຟີລິບປິນມາ. ເລີ່ມເກມໃນຍົກທີ 1 ນັກມວຍທັງສອງຍັງບໍ່ຄ່ອຍເປີດເກມໜັກໃສ່ກັນປານໃດ ເນື່ອງຈາກຍັງລະແວງກັນຢູ່ ແລະ ເປັນຝ່າຍມາເລເຊຍ ຊະນະໄປກ່ອນ 10-9

ຈາກນັ້ນ ຍົກສອງ ສຸລິໄຊ ຂອງລາວກໍເປີດເກມບຸກໜັກ ປ່ອຍອາວຸດໃສ່ຢ່າງເຕັມທີ່ ແລະ ເຂົ້າຕາກຳມະການໄດ້ຫລາຍກວ່າ. ແຕ່ຍັງເຫຼືອບໍ່ເທົ່າໃດວິນາທີ ຈະໝົດເວລາ ສຸລິໄຊ ສິງສະອາດ ກໍພາດທ່າເສຍສະມາທິໄປນ້ອຍໜຶ່ງ ຖືກນັກມວຍມາເລເຊຍ ຕີສອກກັບເຂົ້າໃສ່ປ່າຍຄາງຂອງຕົນຢ່າງເຕັມໆ ຈົນ ສຸລິໄຊ ຕ້ອງຫລັບກາງອາກາດ ລົງໄປກອງເວທີ ໃຫ້ກຳມະການນັບສິບບໍ່ລຸກ! ເຮັດໃຫ້ຫຼຽນຄຳ ທີ່ລໍຄອຍກໍຫຼຸດລອຍໄປ ຢ່າງໜ້າເສຍດາຍ

ຫຼັງຈາກຟື້ນຈາກການເຊືອບຫຼັບຄາເວທີ, “ສຸລິໄຊ ສິງສະອາດ” ກໍອອກມາສະແດງຄວາມເສຍໃຈ ແລະ ຝາກຂໍໂທດແຟນມວຍລາວທັງປະເທດ ທີ່ເຮັດໃຫ້ຜິດຫວັງ ໃນການຊົກຄັ້ງນີ້. ສຸລິໄຊ ກ່າວວ່າ “ນ້ອງເສຍໃຈຫຼາຍທີ່ບໍ່ສາມາດຍາດຫຼຽນຄຳໃຫ້ປະເທດ ຊາດໄດ້ໃນມື້ນີ້, ຂໍໂທດແຟນມວຍລາວທັງປະເທດ ແລະ ກອງເຊຍຊາວລາວທີ່ມາເຊຍຂ້າງສະໜາມທີ່ຟີລິບປິນໃນມື້ນີ້, ນ້ອງເຮັດສຸດຄວາມສາມາດແລ້ວ ນ້ອງຜິດຫວັງອີ່ຫລີ

“ສຸລິໄຊ ສິງສະອາດ” ມາແຂ່ງຂັນຊີເກມຄັ້ງນີ້ ໃນຮຸ່ນນໍ້າໜັກ 45 ກິໂລກຣາມ ຊະນະນັກມວຍໄທ ໃນຮອບທຳອິດ ແລະ ນັກມວຍຫວຽດນາມໃນຮອບທີສອງ ກ່ອນຈະມາເສຍນ໊ອກໃຫ້ນັກມວຍມາເລເຊຍໃນຮອບຊີງຊະນະເລີດ. ໄດ້ຮັບພຽງຫຼຽນເງິນ ໃນຊີເກມຄັ້ງນີ້

ຂ່າວທົ່ວໄປ