ວາລະສຸດທ້າຍຂອງຊີວິດ ຂໍດື່ມສັງສັນກັບໝູ່ກ່ອນໝົດລົມຫາຍໃຈ ເທົ່ານີ້ກໍ່ຍີ້ມໄດ້

ວາລະສຸດທ້າຍຂອງຊີວິດ ຂໍດື່ມສັງສັນກັບໝູ່ກ່ອນໝົດລົມຫາຍໃຈ ເທົ່ານີ້ກໍ່ຍີ້ມໄດ້

ວາລະສຸດທ້າຍຂອງຊີວິດທີ່ເຮົາເຄີຍເຫັນມາ ມັກເປັນໄລຍະເວລາແຫ່ງຄວາມໂສກເສົ້າ ແລະ ອາໄລອາວອນກ່ອນທີ່ຜູ້ນັ້ນຈະຈາກໄປ ແຕ່ເຫດການຈາກສະຫະລັດອາເມລິການີ້ ຊໍ້າພັດແຕກຕ່າງອອກໄປ ກາຍເປັນພາບທີ່ສ້າງແຮງບັນດານໃຈໃຫ້ມີການສະເຫຼີມສະຫຼອງວາລະສຸດທ້າຍຂອງຊີວິດກ່ອນທີ່ຈະສິ້ນລົມຫາຍໃຈ

ສຳນັກຂ່າວບີບີຊີລາຍງານວ່າ ພາບຖ່າຍຂອງ ປູ ນໍເບີດ ເຊມ ເຊິ່ງເປັນຊາວອາເມລິກາ ທີ່ຈາກໂລກໄປໃນໄວ 87 ປີ ໄດ້ກາຍມາເປັນພາບຍອດນິຍົມໃນກຸ່ມຜູ້ໃຊ້ສື່ສັງຄົມອອນລາຍທົ່ວໂລກ ເນື່ອງຈາກກ່ອນທີ່ຈະໝົດລົມ ປູ່ຄົນນີ້ໄດ້ດື່ມສ້າງສັນກັບສະມາຊິກໃນຄອບຄົວເປັນຄັ້ງສຸດທ້າຍ

ພາບດັ່ງກ່າວໄດ້ຖືກເຜີຍແຜ່ລົງໃນບັນຊີທະວິດເຕີ ໂດຍຫຼານຊາຍຂອງປູ່ເອງ ເຊິ່ງເຮັດໃຫ້ມີຄົນມາກົດສະແດງຄວາມຊົມຊອບກວ່າ 3 ແສນຄັ້ງ ແລະ ໄດ້ຮັບການຣີທະວີດ (ແບ່ງປັນ) ໄປອີກກວ່າ 30 ພັນຄັ້ງ ແລະ ຍັງມີຜູ້ເອົາໄປເຜີຍແຜ່ຜ່ານສື່ສັງຄົມອອນລາຍອື່ນໆອີກຢ່າງກວ້າງຂວາງ

ອະດຳ ຜູ້ເປັນຫຼານຊາຍເລົ່າໃນທະວິດເຕີວ່າ “ປູ່ຂອງຂ້ອຍເປັນຄົນມີສຸຂະພາບຂ້ອນຂ້າງດີມາຕະຫຼອດຊີວິດຂອງລາວ. ແຕ່ເມື່ອວັນອາທິດກ່ອນ ເຮົາກໍໄດ້ຮູ້ວ່າການເຂົ້າໂຮງໝໍຄັ້ງນີ້ແມ່ນວາລະສຸດທ້າຍ. ລາຍເອີ້ນຫຼານເຂົ້າໄປບອກເລື່ອງນີ້ໃນວັນຈັນ ແລະ ໃນວັນອັງຄານເຮົາຖ່າຍຮູບຮ່ວມກັນ ກ່ອນທີ່ລາວຈະຈາກໄປຍ້ອນພະຍາດມະເຮັງລຳໄສ້ໄລຍະທີສີ່ໃນມື້ຕໍ່ມາ

ພໍ່ບອກຂ້ອຍວ່າ ປູ່ຢາກດື່ມເບຍ. ເມື່ອໃດທີ່ໄດ້ເບິ່ງຮູບນີ້ ຂ້ອຍຈະຮູ້ສຶກສະຫງົບໃຈຂຶ້ນ ແລະ ຄືກັບໄດ້ຮັບການປອບປະໂລມ. ຂ້ອຍຮູ້ວ່າປູກຳລັງຍິ້ມ ຂະນະທີ່ລາວໄດ້ເຮັດສິ່ງທີ່ຢາກເຮັດ” ອະດຳກ່າວ

ຫຼັງຈາກທີ່ມີການເຜີຍແຜ່ຮູບພາບປະທັບໃຈດັ່ງກ່າວອອກໄປ ກໍມີຜູ້ສະແດງຄວາມເຫັນຊົມຊອບ ແລະ ສົ່ງຂໍ້ຄວາມສະແດງຄວາມເສຍໃຈກັບຄອບຄົວເຊມເປັນຈຳນວນຫຼາຍ. ຂະນະທີ່ຫຼາຍຄົນກໍສົ່ງພາບທີ່ຕົນເອງຮ່ວມດື່ມເປັນກຽດໃຫ້ກັບປູ່ນໍເບີດມານຳ ແລະ ບາງຄົນຍັງໄດ້ໂພສຮູບທີ່ເປັນເລື່ອງລາວຄ້າຍຄືກັນໃຫ້ກັບສາທາລະນະໄດ້ຮັບຮູ້

ຖືວ່າເປັນເລື່ອງລາວທີ່ສ້າງແຮງບັນດານໃຈໃຫ້ຫຼາຍຄົນຢາກສະຫຼອງວາລະສຸດທ້າຍຂອງຊີວິດ ໂດຍ ແອນ ນິວມານ ຜູ້ແຕ່ງປຶ້ມ “ຄວາມຕາຍທີ່ປະເສີດ” (The Good Death) ອະທິບາຍວ່າ ການທີ່ຄົນຈຳນວນຫຼາຍຮູ້ສຶກປະທັບໃຈກັບຮູບຖ່າຍລັກສະນະນີ້ ແມ່ນຍ້ອນມັນເຮັດໃຫ້ເຮົາຫວນຄິດເຖິງຄວາມຕາຍຂອງຄົນທີ່ເຮົາຮັກ ທັງທີ່ເກີດຂຶ້ນແລ້ວ ແລະ ກຳລັງຈະມາເຖິງ.

ນອກນີ້ ພາບຂອງຄອບຄົວເຊມ ຍັງສະທ້ອນໃຫ້ເຫັນ “ຄວາມຕາຍໃນອຸດົມຄະຕິ” ທີ່ຄົນສ່ວນໃຫຍ່ປາດຖະໜາ ນັ້ນກໍຄືການຈາກໂລກນີ້ໄປທ່າມກາງການອ້ອມຮອບດ້ວຍຄວາມອົບອຸ່ນຈາກຄົນທີ່ເຮົາຮັກ ເຊິ່ງເປັນໄປໄດ້ຍາກຂຶ້ນໃນສັງຄົມສະໄໝໃໝ່ ທີ່ສະມາຊິກຄອບຄົວມັກແຍກກັນຢູ່ຄົນລະບ່ອນ

ຂໍຂອບໃຈ ຂໍ້ມູນ : BBC

ຂ່າວທົ່ວໄປ