ອ່ານຂ່າວ ທີ່ແທ້ຈິງ ອັບເດດໃໝ່ໆ

ອ່ານຂ່າວ ທີ່ແທ້ຈິງ ອັບເດດໃໝ່ໆ

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຖະແຫຼງຂ່າວໃນເວລາປະມານ 17:15 ໂມງຂອງມື້ນີ້ (13 ເມສາ 2021) ຊີ້ ບໍ່ມີຜູ້ຕິດເຊື້ອເພີ່ມ, ຂ່າວລືການເຄື່ອນໄຫວຂອງກໍລະນີທີ 50 ບໍ່ແມ່ນຄວາມຈິງ ແລະ ບໍ່ມີການກ່າວເຖິງການລັອກດາວນະຄອນຫຼວງວຽງຈັນ

ສຳລັບສະພາບການລະບາດຂອງໂຄວິດ-19 ໃນ ສປປ ລາວ, ໃນວັນທີ 13 ເມສາ ແມ່ນບໍ່ມີຜູ້ຕິດເຊື້ອກໍລະນີໃໝ່. ຍອດຕິດເຊື້ອສະສົມຍັງຢູ່ທີ່ 52 ກໍລະນີ ແລະ ຍັງມີ 3 ກໍລະນີທີ່ຮັບການປິ່ນປົວຢູ່ໂຮງໝໍມິດຕະພາບ.

ສ່ວນຂ່າວລືກ່ຽວກັບກໍລະນີທີ 50 ທີ່ກ່າວເຖິງການເຄື່ອນໄຫວຕາມທີ່ເປັນຂ່າວໃນສື່ສັງຄົມອອນລາຍວ່າມີການໄປສວນນໍ້າ ຫຼື ຮ້ານບັນເທີງຕ່າງໆນັ້ນ, ທາງຄະນະສະເພາະກິດລະບຸວ່າ ພາຍຫຼັງທີ່ໄດ້ສອບສວນປະຫວັດຢ່າງລະອຽດ ແມ່ນບໍ່ເປັນຄວາມຈິງ ຈຶ່ງຂໍໃຫ້ປະຊາຊົນຢ່າແຕກຕື່ນ.

ພ້ອມນັ້ນ, ຄະນະສະເພາະກິດຍັງໄດ້ກ່າວອີກວ່າ ຖ້າໄດ້ໄປໃຊ້ບໍລິການຮ້ານອິນເຕີເນັດດັ່ງກ່າວ (ຮ້ານ189 ບ້ານໂພນຕ້ອງ ເມືອງຈັນທະບູລີ ນະຄອນຫຼວງວຽງຈັນ) ຕັ້ງແຕ່ວັນທີ 9 ເມສາ ເປັນຕົ້ນມາ ແມ່ນໃຫ້ສັງເກດອາການຂອງຕົນເອງໃນໄລຍະ 14 ມື້ນີ້, ຖ້າຫາກມີອາການທີ່ເຂົ້າຂ່າຍແມ່ນຕິດຕໍ່ກວດຫາເຊື້ອກັບທາງໂຮງໝໍ.

ອີກຢ່າງໜຶ່ງ, ທາງຄະນະສະເພາະກິດຍັງໄດ້ເນັ້ນໃຫ້ໃສ່ໃຈຈັດຕັ້ງປະຕິບັດຕາມແຈ້ງການ, ຄຳແນະນຳຕ່າງໆທີ່ທາງການໄດ້ປະກາດອອກມາກ່ອນໜ້ານີ້ຢ່າງເຂັ້ມງວດ.

ສຳລັບມາດຕະການຈັດຕັ້ງປະຕິບັດໃນໄລຍະບຸນປີໃໝ່ລາວສຳລັບນະຄອນຫຼວງວຽງຈັນ ແມ່ນຈະມີອອກມາໃນໄວໆນີ້.

sienglamphong