ເຈົ້າພາບຊຽງຂວາງເກມ ຈັດໜັກໃຊ້ນັກສະແດງເກືອບ 3 ພັນຄົນໃນພິທີເປີດ-ປິດ ມີ 7 ລາຍການສະແດງ

ເຈົ້າພາບຊຽງຂວາງເກມ ຈັດໜັກໃຊ້ນັກສະແດງເກືອບ 3 ພັນຄົນໃນພິທີເປີດ-ປິດ ມີ 7 ລາຍການສະແດງ

ອີງຕາມ ກອງປະຊຸມຄະນະຮັບຜິດຊອບລະດັບຊາດ ຄັ້ງທີ IV ງານມະຫາກໍາກິລາແຫ່ງຊາດ ຄັ້ງທີ XI ຈັດຂຶ້ນໃນລະຫວ່າງວັນທີ 7-8 ມັງກອນ 2020 ທີ່ຫ້ອງວ່າການປົກຄອງແຂວງ ຊຽງຂວາງ ໂດຍການເປັນປະ ທານຮ່ວມຂອງ ທ່ານ ນາງ ແສງເດືອນ ຫລ້າຈັນທະບູນ, ລັດ ຖະມົນ ຕີກະຊວງ ສຶກສາທິການ ແລະ ກິລາ ແລະ ທ່ານ ບຸນຕົ້ນ ຈັນທະພອນ, ເຈົ້າແຂວງຯ ຊຽງຂວາງ, ປະທານຄະນະຮັບຜິດຊອບຈັດງານມະຫາກໍາກິລາແຫ່ງຊາດ ຄັ້ງທີ XI.

ກອງປະຊຸມຄັ້ງນີ້ ເປັນກອງປະຊຸມຄັ້ງສຸດທ້າຍເພື່ອກະກຽມໃຫ້ແກ່ງານກິລາດັ່ງກ່າວ ໂດຍໄດ້ລາຍງານເຖິງການກະກຽມວຽກງານຕ່າງຯ ຈາກການລາຍງານຂອງ 11 ກໍາກະການເພື່ອກະກຽມໃຫ້ແກ່ງານກິລາແຫ່ງຊາດ ຄັ້ງທີ XI ໂດຍສະເພາະການກະກຽມສະໜາມກິລາຂອງແຂວງທີ່ສ້າງຂຶ້ນໃໝ່ທີ່ສາມາດບັນຈຸຜູ້ຊົມໄດ້ປະມານ 20.000 ຄົນເພື່ອນໍາໃຊ້ເຂົ້າໃນພິທີເປີດ-ປິດງານ ສໍາເລັດແລ້ວເກືອບຮ້ອຍສ່ວນຮ້ອຍ, ເຫລືອພຽງແຕ່ການຕົບແຕ່ງປະດັບປະດາ,ການຕິດຕັ້ງລະບົບຕາຄ່າຍໄຟຟ້າ ແລະ ລະ ບົບໄຟເຍືອງທາງເຂົ້າສູ່ສະໜາມ ແລະ ວຽກອື່ນຯ ຈໍານວນໜຶ່ງ.

ສ່ວນການກະກຽມພິທີເປີດ-ປິດງານ ໄດ້ສໍາເລັດການຄັດເລືອກກ້ອນກໍາລັງສວນສະໜາມ ແລະ ແຫ່ແລ່ນທວນໄຟ ຈໍາວນ 300 ຄົນ ແລະ ນາງສາວຖືປ້າຍ 50 ຄົນ, ສໍາເລັດຄັດເລືອກນັກສະ ແດງ 2.849 ຄົນ, ສໍາເລັດການອອກແບບລາຍການສະແດງລວມມີ 7 ລາຍການແບ່ງເປັນ ມື້ເປີດງານມີ 4 ລາຍການ ແລະ ມື້ປິດງານມີ 3 ລາຍການ. ນອກຈາກນີ້ ວຽກງານກະກຽມສະໜາມແຂ່ງຂັນກິລາແຕ່ລະປະເພດ, ການກະກຽມທີ່ພັກຂອງຄະນະນໍາ ແລະ ນັກກິລາ, ລວມທັງແຂກທີ່ຈະມາຮ່ວມງານ, ການກະກຽມວຽກງານປ້ອງກັນຊາດ-ປ້ອງກັນຄວາມສະຫງົບ, ການຂົນສົ່ງຄະນະນໍາ ແລະ ນັກກິລາ ແລະ ວຽກງານອື່ນ ແມ່ນມີຄວາມພ້ອມແລ້ວໂດຍພື້ນຖານ.

ໂດຍ 28 ປະເພດກີລາໄດ້ກໍານົດເອົາສະຖານທີ່ແຂ່ງຂັນ ດັ່ງນີ້:
– ບານເຕະຍິງ ກໍານົດໃຫ້ແຂ່ງຂັນ ທີ່ສະໜາມກີລາຂອງແຂວງ ບ້ານໂພນມີໄຊ (ສະໜາມເກົ່າ)
– ບານເຕະຊາຍ ແລະ ແລ່ນ-ລານ ແຂ່ງຂັນທີ່ສະໜາມເປີດ-ປິດ (ຄັງໜອງຫລວງ)
– ບານບ້ວງ ແຂ່ງຂັນ ທີ່ຫໍພັກເກົ່າໂຮງຮຽນ ມສ ໂພນສະຫວັນ

-ເທັນນິສ ແຂ່ງຂັນທີ່ສະໂມສອນໂຮງຮຽນ ມສ ໂພນສະຫວັນ
-ດອກປີກໄກ່ ແຂ່ງຂັນທີ່ເດີ່ນສະໂມສອນ ດອກປີກໄກ່ຂອງແຂວງ
-ກະຕໍ້ ແຂ່ງຂັນທີ່ເດີ່ນດອກປີກໄກ່ທະຫານແຂວງ
-ປິ໋ງປ່ອງ ແຂ່ງຂັນທີ່ສະໂມສອນ ພະແນກແຜນການ ແລະ ການລົງທຶນແຂວງ

-ເທຄວັນໂດ ແລະ ມວຍປໍ້າ ແຂ່ງຂັນທີ່ສະໂມສອນ ພະແນກໂຍທາທິການແຂວງ
-ຢູໂດ, ປັ່ນຈັກສີລັກ, ວູຊູ ແລະ ໝາກແລ້ ແຂ່ງຂັນທີ່ເດີ່ນກີລາໃນຮົ່ມ ວິທະຍາໄລ ຄູຄັງໄຂ
-ໝາກເສິກ ແຂ່ງຂັນທີ່ສະໂມສອນ ພະແນກກະສິກໍາ ແລະ ປ່າໄມ້ແຂວງ
-ເຮືອຊ່ວງ ແຂ່ງຂັນທີ່ໜອງສະເດັດ ສຸພານຸວົງ 02
-ໝາກຂ່າງ, ໜ້າເກັກ ແລະ ຍິງທະນູ ແຂ່ງຂັນທີ່ ສະໜາມເປີດ-ປິດ (ຄັງໜອງຫລວງ)

-ບານສົ່ງໃນຮົ່ມ ແລະ ເປຕັງ ແຂ່ງຂັນທີ່ສະໜາມ ສວນມອນ ບ້ານໂງຍ
-ໂບລິ້ງ ແຂ່ງຂັນທີ່ສະໂມສອນໂບລິ້ງ ບ້ານໂພນມີໄຊ

-ກ໊ອຟ ແຂ່ງຂັນທີ່ເດີ່ນກ໊ອຟ ບ້ານນາເທົາ
-ຍິງປືນ ແຂ່ງຂັນທີ່ໂຮງຮຽນນາຍສິບ
-ມວຍລາວ ແລະ ມວຍສາກົນ ແຂ່ງຂັນທີ່ຫາດຊາຍ ອ່າງນໍ້າຫງໍາ
-ສະນຸກເກີ້ ແຂ່ງຂັນທີ່ເດີ່ນບານເຕະ ບ້ານຍວນ.

ໝາຍເຫດ: ຮູບບັນຍາກາດການແຂ່ງຂັນກິລາແຫ່ງຊາດ ຄັ້ງທີ 10 ທີ່ອຸດົມໄຊ ເກມ ຂອງທີມງານຖ່າຍປີ 2014

ທີ່ມາ: Sport Update

ຂ່າວທົ່ວໄປ