ໝໍແນ່ງ ສຸດໃຈບຸນ ຊື້ອຸປະກອນຊ່ວຍໜ່ວຍກູ້ໄພລວມເປັນເງິນ 9 ລ້ານກີບ ເພື່ອຕ້ານໂຄວິດ-19

ໝໍແນ່ງ ສຸດໃຈບຸນ ຊື້ອຸປະກອນຊ່ວຍໜ່ວຍກູ້ໄພລວມເປັນເງິນ 9 ລ້ານກີບ ເພື່ອຕ້ານໂຄວິດ-19

ດັ່ງທີ່ຮູ້ວ່າໃນປັດຈຸບັນ ການແພ່ລະບາດຂອງພະຍາດເຊື້ອໄວຣັດໂຄວິດ-19 ໄດ້ແພ່ລາມເປັນວົງກວ້າງໃນທົ່ວໂລກ. ໂດຍສະເພາະ, ປະເທດລາວກໍມີຍອດຄົນຕິດເຊື້ອໂຄວິດ-19ມາແລ້ວ 8 ຄົນ, ເຮັດໃຫ້ຄົນໃນບັນເທີງຫຼາຍຄົນອອກມາຊ່ວຍເຫຼືອກັນ. ໜຶ່ງໃນນັ້ນກໍແມ່ນ “ໝໍແນ່ງ – ຈັນດາລີ ສິດພະໄຊ” ຜູ້ທີ່ໃຈບຸນ ງົດງາມທັງກາຍ ແລະ ໃຈ ບໍ່ວ່າປະເທດລາວເຮົາ ຈະປະສົບວິກິດ ຫຼື ໄພພິບັດຫຍັງ ເພິ່ນກໍອອກມາຊ່ວຍເຫຼືອຢູ່ເລື້ອຍໆ

ຫຼ້າສຸດ ກໍມີຊາຍຄົນໜຶ່ງໂພສເຟສບຸກສ່ວນໂຕຂອງຕົນທີ່ມີຊື່ວ່າ: Phanouvong Mitnilanh ພ້ອມແທັກຂອບໃຈໝໍແນ່ງ ທີ່ຊ່ວຍເຫຼືອບໍລິຈາກຜ້າອັດປາກ 20 ກ່ອງ, ຖົງມື 5 ແກັດ, ນ້ຳຢາລ້າງມື 2 ກະຕຸກ, ເຫຼົ້າ 90 3 ກະຕຸກ, ເຄື່ອງພົ່ນຢາ 1 ເຄື່ອງ ລວມເປັນເງິນທັງໝົດປະມານ 9,000,000 ກີບໃຫ້  “ໜ່ວຍກູ້ໄພມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ 1623” ແລະ ຂຽນແຄັບຊັນວ່າ: “ຂອບໃຈຫຼາຍໆທີ່ຍັງເຫັນຄວາມສຳຄັນພວກລູກຕັ້ງແຕ່ເຂື່ອນແຕກອັດຕະປື ແລະ ໄດ້ມາເຈິກັບໄວຣັດໂຄວິດ-19 ແມ່ສົມເປັນຄົນຂອງສັງຄົມອີ່ຫຼີ. ເຄື່ອງທີ່ແມ່ມອບໃຫ້ພວກລູກຈະນຳໄປໃຊ້ໃຫ້ເກີດປະໂຫຍດໃຫ້ແກ່ສັງຄົມ ແລະ ປະເທດເຮົາ”

ນອກຈາກນັ້ນຍັງໄດ້ຮັບບໍລິຈາກເຄື່ອງພົ່ນຢາຈາກພໍ່ແມ່ປະຊາຊົນນຳໃນການຊຸກຍູ້ຊ່ວຍເຫຼືອໃນຄັ້ງນີ້ ພ້ອມນີ້ໜ້ວຍກູ້ໄພ 1623 ຈະໃຫ້ບໍລິການພົ່ນຢາຂ້າເຊື້ອໃຫ້ບ້ານເຮືອນ,ຫ້ອງການ,ຮ້ານຄ້າຕ່າງໆໃຫ້ປະຊາຊົນໂດຍ (ບໍ່ໄດ້ເສຍຄ່າ). ໃນຊ່ວງວິກິດການໄວຣັດ COVID-19 ນີ້, ຖ້າຜູ້ໃດຫາກມີຄວາມສົນໃຈກໍສາມາດຕິດຕໍ່ມາໄດ້ທີ່ເບີ 1623 ຕະຫລອດ 24 ຊົ່ວໂມງ. ພວກເຮົາມີຄວາມສຸກທີ່ເຫັນຄົນລາວຊ່ວຍເຫຼືອກັນ ແລະ ຂອບໃຈທຸກພາກສ່ວນ ເຊື່ອຢ່າງຍິ່ງວ່າພວກເຮົາຈະຜ່ານວິກິດນີ້ໄປນຳກັນໄດ້ຢ່າງແນ່ນອນ

ຂ່າວບັນເທີງ