ຊາຍກໍ່ເຫດກະທຳຊຳເລົາ ແລ້ວຄາດຕະກຳ 2 ສາວນັກຮຽນ ຖືກຕັດສິນປະຫານຊີວິດ

ຊາຍກໍ່ເຫດກະທຳຊຳເລົາ ແລ້ວຄາດຕະກຳ 2 ສາວນັກຮຽນ ຖືກຕັດສິນປະຫານຊີວິດ

ສານຂັ້ນຕົ້ນແຂວງອຸດົມໄຊ ຕັດສິນປະຫານຊີວິດ ຈໍາເລີຍ ອາຍຸ 19 ປີ ທີ່ກໍ່ເຫດຄາດຕະກໍາ ແລະ ຂົ່ມຂືນທໍາສໍາເລົາ 2 ສາວນັກຮຽນອາຍຸ 19 ປີ ໄປເກັບຜັກຢູ່ປ່າເຂດບ້ານພູສອນ ເມືອງຮຸນ ແຂວງອຸດົມໄຊ ພ້ອມໃຊ້ແທນຄ່າປົວແປງຈິດໃຈ, ຄ່າສົ່ງສະການ ແລະ ຄ່າສິ້ນເປືອງຕ່າງໆໃຫ້ແກ່ໂຈດທາງແພ່ງທັງ 2 ຄົນ ລວມເປັນເງິນ 130.000.000 ກີບ.

ຄະດີດັ່ງກ່າວ,ຄະນະສານອາຍາສານປະຊາຊົນຂັ້ນຕົ້ນແຂວງອຸດົມໄຊ ນໍາຂຶ້ນມາຕັດສິນ ໃນວັນທີ 6 ກັນຍາ 2019 ໂດຍຕັດສິນປະຫານຊີວິດຈໍາ ເລີຍ 1 ຊື່ ທ້າວ ຍົມ ຫຼື ເທາະ ອາຍຸ 19 ປີ ສະຖານຄາດຕະກໍາ ແລະ ຂົ່ມຂືນທໍາສໍາເລົາ, ຈຳເລີຍ 2 ຊື່ ທ້າວ ລັງ ອາຍຸ 60 ປີ (ພໍ່ຈໍາເລີຍ 1 ) ຈຳຄຸກ 2 ປີ ສະຖານປິດບັງການກະທຳຜິດ. ທັງ 2 ຄົນ ຢູ່ບ້ານພູສອນ ເມືອງຮຸນ ແຂວງອຸດົມໄຊ

ຄະດີເກີດຂຶ້ນໃນວັນທີ 13 ຕຸລາ 2018, ໂດຍ ນາງ ສວຍ ແລະ ນາງ ແສງທັນ ທັງ 2 ຄົນ ອາຍຸ 19 ປີ ເປັນນັກ ຮຽນຄົນບ້ານດຽວກັນ (ຜູ້ເສຍຊີວິດ) ໄດ້ອອກໄປເກັບຜັກຢູ່ເຂດບ້ານພູສອນ. ເມື່ອ ທ້າວ ຍົມ (ຈຳເລີຍ 1) ຮູ້ວ່າ: 2 ສາວດັ່ງກ່າວໄປເກັບຜັກຢູ່ປ່າແຄມບ້ານ ຈຶ່ງໄດ້ຕິດຕາມໄປເພາະວ່າ ທ້າວ ຍົມ ໄດ້ແອບມັກ ນາງ ສວຍ ມາດົນນານແລ້ວ. ພໍໄປຮອດເຫັນ ນາງ ສວຍ ກໍາລັງເກັບພັກຢູ່ ທ້າວ ຍົມ ຈຶ່ງຍ່າງເຂົ້າໄປກອດຈູບ ນາງ ສວຍ, ແຕ່ນາງ ສວຍ ໄດ້ປະຕິເສດ ແລ້ວຮ້ອງຂໍຄວາມຊ່ວຍເຫຼືອ. ຈາກນັ້ນ, ທ້າວ ຍົມ ຈຶ່ງເອົາກໍາປັ້ນຕີໜ້າ 3 ບາດ ເຮັດໃຫ້ ນາງ ສວຍ ລົ້ມລົງພື້ນແລ້ວຈັບເອົາກ້ອນຫີນມາທຸບໜ້າ 3 ບາດ; ໃນລະຫວ່າງນັ້ນ, ນາງ ແສງທັນ

ຈຶ່ງແລ່ນມາຈັບໄມ້ຍາວ 60 ຊັງຕີແມັດຕີຫຼັງ ຈຳເລີຍ 1 ບາດ ແຕ່ຈຳເລີຍ ຍັງເອົາກ້ອນຫີນຕີໜ້າ ນາງ ສວຍ ອີກ 1 ບາດ, ນາງ ແສງທັນ ຈຶ່ງແລ່ນໜີ ຈຳເລີຍ 1 ໄດ້ແລ່ນນໍາໄປເຕະໃສ່ຂາຂອງ ນາງ ແສງທັນ ລົ້ມລົງພື້ນກ່ອນເອົາກໍາ ປັ້ນຕີໜ້າ 2 ບາດ ຈັບເອົາພ້າຂອງ ນາງ ແສງທັນ ຟັນໜ້າ 6 ບາດ ເຮັດໃຫ້ ນາງ ແສງທັນ ເສຍຊີວິດຄາທີ່, ຈຳ ເລີຍ 1 ກໍ ກັບໄປຮ່ວມເພດກັບ ນາງ ສວຍ ທີ່ຍັງມີຊີວິດຢູ່ຈົນສໍາເລັດ, ແລ້ວໄປຕັດໄມ້ມາເຫຼົາປາຍຈົນແຫຼມກ່ອນແທງໃສ່ຫຼັງເບື້ອງຂວາຂອງ ນາງ ສວຍ ຈົນເສຍຊີວິດ ຈຶ່ງໄປຮ່ວມເພດກັບ ນາງ ແສງທັນ ທີ່ເສຍຊີວິດແລ້ວ ສໍາເລັດ 1 ຄັ້ງ

ທ້າວ ລັງ ຈຳເລີຍ 2 (ພໍ່) ມາພົບເຫັນ ຈຶ່ງບອກໃຫ້ລູກຊາຍ ເຈາະເອົາແກ່ນຕາທັງ 2 ຄົນອອກ (ຄວາມເຊື່ອສ່ວນບຸກຄົນ) ແລ້ວຈຳເລີຍ 1 ຈຶ່ງໄດ້ເອົາກ້ອນຫີນທີ່ມີຄົມປາດເອົາໜັງໜ້າ, ກະໂຫຼກຫົວທີ່ແຕກຫັກ, ຈົກເອົາຕາທັງ 2 ເບື້ອງ, ຈົກເອົາສະໝອງ ແລະ ເອົາກະໂຫຼກຫົວທີ່ແຕກເປັນຊິ້ນສ່ວນໃສ່ຖົງຢາງດຽວກັນໄປຖິ້ມຢູ່ປ່າເຂດດັ່ງກ່າວ ແລ້ວຕັດຫງ່າໄມ້ມາປົກສົບໄວ້ ກ່ອນກັບເຮືອນ. ຮອດວັນທີ 15 ຕຸລາ 2018, ມີຄົນພົບສົບຜູ້ເສຍຊີວິດທັງ 2 ຄົນ ແລະ ຮອດວັນທີ 18 ຕຸລາ 2018 ຈຶ່ງຖືກເຈົ້າໜ້າທີ່ກັກຕົວມາດໍາເນີນການຄະດີ

ການກະທໍາຂອງ ທ້າວ ຍົມ ( ຈໍາເລີຍ 1 ); ໃນຄັ້ງນີ້, ໄດ້ກຳນົດໄວ້ໃນກົດໝາຍອາຍາແຫ່ງ ສປປ ລາວ ວ່າ: ໃນກໍລະນີທີ່ ຜູ້ກະທໍາຜິດຫາກໄດ້ເອົາການຄາດຕະກໍາເປັນອາຈີນ, ຂ້າຄົນໂດຍມີແຜນການ, ຂ້າຄົນຢ່າງໂຫດຮ້າຍປ່າເຖື່ອນ, ຂ້າພະນັກງານທີ່ກໍາລັງປະຕິບັດໜ້າທີ່, ຂ້າຫຼາຍຄົນ, ຂ້າຜູ້ຍິງຖືພາ, ຂ້າຄົນເພື່ອປິດບັງການກະທໍາຜິດອື່ນ, ຂ້າຄົນທີ່ບໍ່ສາມາດຊ່ວຍເຫຼືອຕົນເອງໄດ້ ຫຼື ຢູ່ໃນສະພາບອ່ອນແອ, ຂ້າຄົນເພື່ອເອົາອະໄວຍະວະຈະຖືກລົງໂທດຕັດອິດສະລະພາບ ແຕ່ 10-20 ປີ ແລະ ຈະຖືກປັບໃໝ 2.000.000-10.000.000 ກີບ, ອາດຈະຖືກຈໍາກັດທີ່ຢູ່ ຫຼື ຕັດອິດສະລະພາບຕະຫຼອດຊີວິດ ຫຼື ປະຫານຊີວິດ ແລະ ໝວດທີ 6 ວ່າດ້ວຍການກະທໍາຜິດຕໍ່ສາຍຜົວເມຍ, ຄອບຄົວ ແລະ ຮີດຄອງປະເພນີ, ມາດຕາ 128 ວັກ 4 ກໍານົດວ່າ: ໃນກໍລະນີທີ່ຜູ້ກະທໍາຜິດຫາກໄດ້ຂົ່ມຂືນທໍາສຳເລົາແລ້ວໄດ້ຂ້າຜູ້ຍິງນັ້ນຖິ້ມຈະຖືກລົງໂທດຕັດອິດສະລະພາບແຕ່ 15-20 ປີ ແລະ ຈະຖືກປັບໃໝແຕ່ 10.000.000-20.000.000 ກີບ ຫຼື ຕັດອິດສະລະພາບຕະຫຼອດຊີວິດ ຫຼື ປະຫານຊີວິດ

ການກະທຳຂອງຈໍາເລີຍ 2 ເປັນການກະທໍາຜິດທີ່ລະບຸໄວ້ວ່າ: ບຸກຄົນຜູ້ໃດຫາກໄດ້ຮູ້ ຫຼື ໄດ້ເຫັນການກະທໍາ ຜິດຂອງຜູ້ອື່ນ ແລ້ວບໍ່ລາຍງານຕໍ່ເຈົ້າໜ້າທີ່ຈະຖືກລົງໂທດຕັດອິດສະລະພາບແຕ່ 3 ເດືອນ ຫາ 2 ປີ ຫຼື ດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໃໝແຕ່ 200.000 -2.000.000 ກີບ ເຫັນວ່າ: ຈໍາເລີຍ 2 ມີອາຍຸ 60 ປີ 6 ເດືອນ 28 ວັນ, ເຊິ່ງເປັນສາເຫດທີ່ພາໃຫ້ຫຼຸດຜ່ອນຄວາມຮັບຜິດຊອບທາງອາຍາ ຕາມກົດໝາຍອາຍາ ມາດຕາ 40 ຂໍ້ 1

ຂ່າວທົ່ວໄປ