6 ປັດໄຈທີ່ເຮັດໃຫ້ກິລາບານເຕະທີມຊາດລາວບໍ່ມີການພັດທະນາ ໃນການແຂ່ງຂັນຊຸຊູກິຄັບ 2020

6 ປັດໄຈທີ່ເຮັດໃຫ້ກິລາບານເຕະທີມຊາດລາວບໍ່ມີການພັດທະນາ ໃນການແຂ່ງຂັນຊຸຊູກິຄັບ 2020

ທ່ານ ນາງ ກັນຍາ ແກ້ວມະນີ ເລຂາທິການສະຫະພັນບານເຕະແຫ່ງຊາດລາວ ໄດ້ກ່າວໃນໂອກາດຖະແຫລງຂ່າວຕໍ່ສື່ມວນຊົນຄັ້ງວັນທີ 7 ມັງກອນ 2022 ວ່າ: ສຳລັບການແຂ່ງຂັນບານເຕະ AFF SUZUKICUP 2020 ເຊິ່ງໄດ້ຈັດຂຶ້ນແຕ່ວັນທີ 5 ທັນວາ 2021 ຫາ ວັນທີ 1 ມັງກອນ 2022 ທີມຊາດລາວບໍ່ສາມາດຍາດໄດ້ໄຊຊະນະຈັກຄະແນນັ້ນ ມີຢູ່ 6 ປັດໄຈຄື:

ອັນທີໜຶ່ງ ການເຄື່ອນໄຫວກິລາທຸກປະເພດຢູ່ບ້ານເຮົາໄດ້ຖືກໂຈະການເຄື່ອນໄຫວມາເປັນເວລາ 2 ປີກວ່າ, ຊ້ຳບໍ່ໜຳ ໄດ້ຫັນເອົາສະໜາມກິລາ ແລະ ສູນຝຶກກິລາບານເຕະເປັນໂຮງໝໍພາກສະໜາມເພື່ອປິ່ນປົວຜູ້ທີ່ຕິດເຊື້ອໂຄວິດ-19.

ອັນທີສອງ: ຄູ່ແຂ່ງເຂົາມີຄວາມພ້ອມຫລາຍກວ່າ ເກັ່ງກວ່າ ແລະ ມີຫລາຍສະໂມສອນອາຊີບ ຕົວຢ່າງຫວຽດນາມມີເຖິງ 14 ສະໂມສອນ, ມາເລເຊຍມີ 12 ສະໂມສອນ, ອິນໂດເນເຊຍ 18 ສະໂມສອນ, ກຳປູເຈຍມີ 13 ສະໂມສອນ, ສ່ວນລາວເຮົາແມ່ນບໍ່ມີສະໂມສອນອາຊີບຈັກສະໂມສອນເລີຍ.

ອັນທີສາມ: ເຂົາມີນັກເຕະອາຊີບທີ່ໄປຄ້າແຄ່ງຢູ່ລີກສາກົນໃນຫລາຍປະເທດ ບໍ່ວ່າໃນເອີຣົບ ແລະ ອາຊີ.

ອັນທີສີ່: ເວລາຝຶກຊ້ອມມີໜ້ອຍ.

ອັນທີຫ້າ: ປະສົບປະການຂອງນັກເຕະລາວເຮົາບໍ່ສູງ ສ່ວນຫລາຍມີແຕ່ຄົນໜຸ່ມນ້ອຍ ຜູ້ມີປະສົບປະການແດ່ກໍຖືກອົງການບານເຕະສາກົນລົງໂທດເຖິງ 45 ຄົນ.

ອັນທີ 6: ແມ່ນບໍ່ມີເງິນພຽງພໍໃນການລົງທຶນຈ້າງຄູຝຶກລະດັບສູງມາຝຶກແອບນັກກິລາບານເຕະທີມຊາດບ້ານເຮົາໃຫ້ກ້າວໜ້າພັດທະນາ ແລະ ທັນສະໄໝຄືບ້ານເຂົາ.

ນີ້ຄື 6 ປັດໄຈຫລັກໆໃນການປະລາໄຊຂອງທີມຊາດລາວເຮົາທີ່ໄປຮ່ວມແຂ່ງຂັນຊຸຊູກິຄັບ 2020 ເມື່ອບໍ່ດົນມານີ້.

ແນວໃດກໍຕາມ, ໃນເມື່ອເຮົາເຫັນບັນດາປັດໄຈທີ່ພາໃຫ້ວົງການບານເຕະ ໂດຍສະເພາະບານເຕະທີມຊາດບ້ານເຮົາປະສົບຄວາມຫລົ້ມເຫລວແລ້ວ ເຮົາກໍຕ້ອງມີວິທີແກ້ໄຂບໍ່ໃຫ້ແກ້ຕົວ ເພາະທຸກຢ່າງມັນຂຶ້ນກັບຄົນເປັນຜູ້ເຮັດ ແລະ ເປັນຜູ້ສ້າງມັນຂຶ້ນມາ ດັ່ງສຸພາສິດເຂົາວ່າ: ມີເງິນເຕັມພາ ບໍ່ທໍ່ຜະຫຍາເຕັມປູມ. ໃນອະນາຄົດຕໍ່ໜ້າ ຄົນລາວ ປະຊາຊົນລາວ ແລະ ແຟນບານຊາວລາວທຸກທົ່ວໜ້າຢາກເຫັນການປ່ຽນແປງ ແລະ ການພັດທະນາທີ່ດີຂຶ້ນຂອງທີມຊາດລາວເໝືອນດັ່ງປະເທດອື່ນໆໃນອາຊຽນ. ກິລາບານເຕະທີມຊາດບ້ານເພິ່ນມີການພັດທະນາ ສ່ວນກິລາບານເຕະບ້ານໂຕໄດ້ຍິນແຕ່ຂ່າວບໍ່ດີ, ຊ້ຳບໍ່ໜຳ ພັດມີຂ່າວວ່າພາກັນລົ້ມບານ ມັນລະປຸກກວ່າຢາບ້ານຫ້ອມ.

ຂ່າວທົ່ວໄປ